Donald Tramp və Vladimir Putin arasında görüş necə nəticələnməsindən asılı olmayaraq, ən çox zərəri Kiyev görəcək – bunu Slovakiyanın baş naziri Robert Fico bəyan edib.

Ficonun sözlərinə görə, yaxın həftələrdə baş verəcək hadisələr o qədər də xoş olmayacaq.

“Xatırlayırsınızmı, mənim tez-tez təkrar etdiyim qədim afrika müdrikliyini? Fərqi yoxdur fillər nə edirlər, əziyyət çəkən ot olur. 15 avqustda söhbət necə bitəcək, fərqi yoxdur – əziyyət çəkən ot olur, bu halda isə Ukraynadır”, – Fico bildirib.

Slovakiya baş naziri vurğulayıb ki, ən vacib məsələ hərbi əməliyyatların dərhal dayandırılması barədə razılığa gəlməkdir.

“Sonra görəcəksiniz ki, Rusiyanı ən pis sözlərlə adlandıran bütün insanlar necə qaçacaq. Bu nəhəng ölkədə onlar bir-birini ötərək ‘biznes imkanları’ axtarışına çıxacaqlar”, – Fico qeyd edib.

Xatırladaq ki, ABŞ prezidenti Donald Tramp və Rusiya prezidenti Vladimir Putin arasında görüş 15 avqustda Alyaskada keçiriləcək.