Revaz Soxadze – Yük avtomobillərinin hərəkətinin Mtsxeta şəhərinə yönəldilməsinin səbəb olduğu narahatlığı minimuma endirmək üçün hər şeyi edəcəyik

İnfrastruktur naziri Revaz Soxadze Gürcüstan Parlamentinin üzvü Dimitri Xundadze, Mtsxeta-Mtianeti bölgəsi üzrə dövlət nümayəndəsi Levan Zautaşvili və Avtomobil Yolları Departamentinin sədri Levan Daraxvelidze ilə birlikdə Mtsxetada olub və Araqvi çayı üzərindəki körpüdə yük avtomobillərinin hərəkətinə qoyulan müvəqqəti məhdudiyyətlə bağlı yaranmış vəziyyətlə yerində tanış olub.

“İctimaiyyətə məlumdur ki, profilaktik tədbir çərçivəsində Mtsxeta yaxınlığında, Araqvi çayı üzərindəki körpüdə yük avtomobillərinin hərəkəti məhdudlaşdırılıb və müvəqqəti olaraq Mtsxeta şəhərinə yönəldilib. Məhz buna görə bu gün Mtsxetada idik ki, bu qərar nəticəsində hansı problemlərin yarandığını yerində görək. Yerli hakimiyyətlə birlikdə mövcud vəziyyətlə tanış olduq və yük avtomobillərinin hərəkətinin şəhərə yönəldilməsinin səbəb olduğu narahatlığı minimuma endirmək üçün hər şeyi edəcəyik” – Revaz Soxadze bildirib.

Nazir Dimitri Xundadze və Levan Zautaşvili ilə birlikdə Araqvi çayı üzərində yeni körpünün tikintisi prosesinin gedişatına da baxış keçirib, işlərin irəliləməsi və tempi ilə tanış olub.

İnfrastruktur Nazirliyi yeni körpünün tikintisinin aktiv mərhələdə olduğunu bəyan edib.

İnfrastruktur nazirinin bəyanatına əsasən, işlərin ilin sonuna qədər başa çatdırılması planlaşdırılır, bundan sonra da yük avtomobilləri üçün tətbiq edilən müvəqqəti məhdudiyyət aradan qaldırılacaq və nəqliyyatın hərəkəti adi rejimə qayıdacaq.

“Həmçinin, Araqvi çayı üzərində yeni körpünün tikintisinin irəliləyişini və işlərin gedişat tempini qiymətləndirdik. Ümid edirik ki, işlər ilin sonuna qədər başa çatacaq və bundan sonra nəqliyyatın hərəkəti adi rejimə qayıdacaq” – infrastruktur naziri bildirib.

Profilaktik tədbir çərçivəsində Araqvi çayı üzərindəki körpüdə qərbdən şərq istiqamətində hərəkət edən yük avtomobillərinin hərəkəti müvəqqəti məhdudlaşdırılıb və avtonəqliyyat vasitələri Narekvavi-Mtsxeta-Zahesi alternativ marşrutuna yönəldilib. Araqvi çayı üzərindəki mövcud körpü 1970-ci illərdə tikilib. Hərəkətin artan intensivliyini və körpünün yüklənməsini nəzərə alaraq, mövcud körpüyə paralel olaraq müasir standartlara uyğun yeni körpünün tikintisi aparılır. O, istismara verildikdən sonra yük avtomobilləri üçün tətbiq edilən məhdudiyyət ləğv olunacaq.