“Reuters” – Pentaqonun nümayəndəsi ABŞ-a Ukraynanın hərbi istehsal səviyyəsinə yaxınlaşmaq üçün illər ərzində işləmək lazım gələcəyini bildirir

ABŞ-a Ukraynanın hərbi istehsal səviyyəsinə yaxınlaşmaq üçün illər ərzində işləmək lazım gələcək – bu barədə Pentaqonun nümayəndəsi “Reuters”lə söhbəti zamanı bildirib.

Ölkədə dronların istehsalının inkişafına cavabdeh olan Pentaqonun nümayəndəsi, Amerika sənayesinin bu istiqamətdə hələ də başlanğıc mərhələsində olduğunu və hərbi istehsalın miqyasına görə Ukraynadan əhəmiyyətli dərəcədə geri qaldığını deyib.

Xüsusilə, “Drone Dominance” dron proqramının rəhbəri Trevis Mets Ukraynanın ayda 500 000 hərbi dron istehsal etdiyini bildirib. Metsin sözlərinə əsasən, Ukrayna cari ildə 6-7 milyon dron yaradacaq, ABŞ isə 1,1 milyard dollar dəyərindəki proqram çərçivəsində 2027-ci ilin fevral ayınadək ümumilikdə 200 minə yaxın dron sifarişi həyata keçirmiş olacaq.

“Sıfırdan 200 000-ə çatmaq, onun miqyaslarını böyütməkdən daha çətindir” – Mets bildirib.

Lakin Pentaqonun hərbi dronların Amerika istehsalı olan komponentlərdən hazırlanmalı olduğuna dair yeni qaydalar qəbul etməsindən sonra ABŞ-nin dronların istehsalını genişləndirməsi mürəkkəbləşib. İyulun 23-də dərc olunmuş yenilənmiş sənəddə hökumətin son məqsədinin kiçik pilotsuz uçuş sistemlərinin “tamamilə yerli” təchizat zəncirini yaratmaq olduğu qeyd olunub.

Mets, çətin əldə olunan komponentlərin ABŞ üçün ən böyük çağırışlardan biri olaraq qaldığını bildirib. Onun bəyanatına əsasən, dronların tərkibində qadağan olunmuş detallar, məsələn, Çində istehsal olunmuş mühərrik və batareyalar olmamalıdır.

Mövcud çətinliklərə baxmayaraq, Mets ABŞ-nin nəhayət Ukraynanın dron sənayesi ilə eyni səviyyəyə çata biləcəyini bildirir.