“Reuters” – İran İraqın bir neçə neft tankerinin Hörmüz boğazından keçməklə hərəkət etməsinə icazə verib

Bağdadın müxtəlif kanallar vasitəsilə Tehrana dəfələrlə etdiyi müvafiq müraciətlərdən sonra İran İraqın bir neçə neft tankerinin Hörmüz boğazından keçməklə hərəkət etməsinə icazə verib. Bu barədə məlumatı “Reuters” İran mediasına istinadən yayır.

Medianın məlumatında, İraq tankerləri üçün xüsusi icazənin alınmasının İran Parlamentinin spikeri Mohamad Bağer Ğalibafinin İraqa səfəri zamanı Bağdadın əsas tələblərindən biri olduğu deyilir.

İraq Prezidenti Nizar Amedinin bəyan etdiyi üzrə, son günlərdə İran İraq neftini daşıyan gəmilərin Hörmüz boğazından keçməsinə şərait yaradıb. Onun sözlərinə əsasən, Bağdad iranlı rəsmilərlə İraq neftinin Hörmüz vasitəsilə ixracı məsələsini də müzakirə edib. Bununla yanaşı, Nizar Amedi bu məsələnin hələ də mürəkkəb qaldığını bildirib.

İraq İran tərəfindən Hörmüz boğazının faktiki olaraq bağlanmasından ən çox zərər çəkən ölkələr sırasındadır. İran müharibəsi başlamazdan əvvəl İraq gündə təxminən 4 milyon barel neft hasil edirdi.

İraqın Baş naziri bildirib ki, Bağdad Türkiyənin Ceyhan limanı vasitəsilə ixracı artırmaq, həmçinin Suriyanın Banias və İordaniyanın Akaba limanları vasitəsilə neft ixracına başlamaq üzərində işləyir.