“Reuters” – Donald Tramp administrasiyası xarici tələbələr üçün müəyyən növ təcrübə proqramlarına iş icazələrinin verilməsini məhdudlaşdırmağı planlaşdırır

Donald Tramp administrasiyası ABŞ universitetlərinə yeni memorandum göndərib. Sənədə əsasən, beynəlxalq tələbələr üçün müəyyən növ staj proqramları üzrə iş icazələrinin verilməsinin məhdudlaşdırılması planlaşdırılır.
Avqustun 24-də tarixlənmiş sənəddə bildirilir ki, Tələbələr və Mübadilə Ziyarətçiləri Proqramı (SEVP) universitetlərin tələbələrə təhsil proqramları ilə bağlı praktiki iş fəaliyyəti üçün müvafiq qaydaları pozaraq icazələr verdiyi halları müəyyən edib.
Memoranduma əsasən, qaydalara əməl etməyən universitetlər xarici tələbələri qəbul etmək hüququnu itirə bilərlər.
Yeni göstərişlər səbəbindən bəzi universitetlər, o cümlədən Kaliforniya Universitetinin Los-Anceles və Berkli kampusları, beynəlxalq tələbələr üçün müəyyən iş icazələrinə dair müraciətlərin qəbulunu və emalını müvəqqəti dayandırıb. Berkli Universitetinin Beynəlxalq Ofisinin məlumatına görə, bəzi müraciətlərin yaxın gələcəkdə emal edilməsi mümkün olmaya bilər.
ABŞ Daxili Təhlükəsizlik Departamentindən bildirilib ki, mövcud qaydalar dəyişdirilməyib. Bununla belə, universitetlərə və işəgötürənlərə xəbərdarlıq edilib ki, proqramdan sui-istifadəyə Tramp administrasiyası dövründə artıq yol verilməyəcək.