Böyük Britaniya və Fransanın hava qüvvələri Suriyada yerləşən “İslam Dövləti”nin yeraltı silah anbarının bombalanmasını hədəfləyən birgə əməliyyat keçiriblər. Bu barədə “Reuters” Böyük Britaniyanın Müdafiə Nazirliyinə istinadən məlumat yayıb.

Birləşmiş Krallığın açıqlamasına görə, Qərb aviasiyası 2019-cu ilə qədər Suriyanın bəzi ərazilərinə nəzarət etmiş islamçı qruplaşmanın yenidən canlanmasının qarşısını almaq məqsədilə patrul uçuşları həyata keçirib. Böyük Britaniyanın Müdafiə Nazirliyinin məlumatına əsasən, kəşfiyyat Palmiranın şimalında yerləşən dağlarda, ehtimal ki, silah və partlayıcı maddələrin saxlanılması üçün istifadə olunan yeraltı obyekti aşkarlayıb.

“Obyektə aparan bir neçə tunelin bombalanması üçün təyyarələrimiz Paveway IV tipli idarəolunan bombalardan istifadə edib. Hazırda ətraflı qiymətləndirmə aparılır, ilkin əlamətlər hədəfin məhv edildiyini göstərir. Bütün təyyarələrimiz təhlükəsiz şəkildə geri qayıdıb. Bu əməliyyat Böyük Britaniyanın liderliyini və müttəfiqlərimizlə çiyin-çiyinə dayanaraq Yaxın Şərqdə ‘Daeş’in və onların təhlükəli, zorakı ideologiyalarının yenidən dirçəlməsinin qarşısını almaq əzmimizi nümayiş etdirir”, – Böyük Britaniyanın Müdafiə Nazirliyinin bəyanatında qeyd olunur.