Gürcüstan ərazisində qəzaya uğrayan türk hərbi yük təyyarəsinin qara qutusu tapılıb, Gürcüstan hakimiyyəti prosesdə maksimum kömək və əməkdaşlığı təmin edir, Azərbaycanlı qardaşlarımız da həmçinin bütün lazımi dəstəyi və töhfəni verirlər – bu haqda Türkiyə Prezidenti Rəcəb Tayyib Ərdoğan bildirib.

Ərdoğan bir daha həlak olanların ailələrinə başsağlığı verib.

“Dünən gecə 46 nəfərlik istintaq qrupumuzun hadisə yerinə getməsini təmin etdik. Təyyarəmizin qara qutusu tapılıb və istintaq başladılıb. 19 şəhidimizin cəsədini tapmışıq. Sonuncu cəsədin axtarışı davam edir. Bu faciəli hadisəni bütün perspektivlərdən araşdırırıq. Gürcüstan hakimiyyəti prosesdə maksimum kömək və əməkdaşlığı təmin edir. Azərbaycanlı qardaşlarımız da həmçinin bütün lazımi dəstəyi və töhfəni verirlər” – Ərdoğan bildirib.

Məlumat üçün bildirək ki, Siğnaği Munisipalitetində Gürcüstanın dövlət sərhədindən təxminən 5 kilometrdə türk hərbi təyyarəsi qəzaya uğrayıb. Təyyarə Azərbaycan-Türkiyə istiqamətində reys yerinə yetirirdi. Faktla əlaqədar istintaq Cinayət Məcəlləsinin 275-ci maddəsinin 4-cü hissəsi ilə aparılır, bu isə insan ölümü ilə nəticələnən hava nəqliyyatının hərəkət təhlükəsizliyi və ya istismarı qaydasının pozulması deməkdir.