“Qrantlar haqqında” qanuna dəyişikliklər edilməsi planlaşdırılır. Qanun layihəsi gələn həftə parlamentin bürosunun iclasına təqdim olunacaq. Dəyişikliklərlə bir neçə proqram çərçivəsində verilən qrantlar üçün hökumətin razılığı tələb olunmayacaq.

Xüsusilə, qanun layihəsində qeyd olunub ki, qanunun 51-ci maddəsinin 3-cü bəndi aşağıdakı redaksiya ilə formalaşdırılacaq – bu maddə ilə müəyyən edilmiş qayda beynəlxalq idman assosiasiyası, federasiyası və komitəsi tərəfindən verilən qrantlara, Gürcüstanın hüdudlarından kənarda ümumi və ali təhsil almaq və elmi fəaliyyət üçün verilən fərdi maliyyə dəstəyinə, eləcə də Avropa İttifaqının tədqiqat və innovasiya proqramı “Horizon Europe” və Avropa İttifaqının “Erasmus+” proqramı çərçivəsində verilən qrantlara şamil olunmayacaq.

“Mövcud qanunvericilik tənzimləməsi şəraitində, Avropa İttifaqının tədqiqat və innovasiya proqramı “Horizon Europe” və Avropa İttifaqının “Erasmus+” proqramı çərçivəsində verilən qrantlar üçün müvafiq razılıq tələb olunur. Gürcüstan qeyd olunan proqramların həyata keçirilməsi üçün müəyyən töhfə verdiyindən (pul şəklində töhfə ), bu proqramlar çərçivəsində verilən qrantlar suverenliyin pozulması, siyasi müdaxilə və ya təhlükəsizlik riskləri baxımından daha az riskli hesab oluna bilər. Bundan irəli gələrək, bu proqramlara istisna qaydasının şamil edilməsi məqsədəuyğun hesab edilir” – qanun layihəsinin izahat vərəqəsində qeyd olunur.

Dəyişikliklərin təşəbbüskarları olan deputatlardır: Arçil Qorduladze, Tornike Ceişvili, Aleksandre Tabatadze, Davit Matikaşvili, Rati İonatamişvili, Aluda Ğuduşauri, Tenqiz Şarmanaşvili, Quram Macaraşvili və Akaki Aladaşvili.