Dövlət ali təhsil müəssisələrinin rektorları ilə görüşdə ali təhsil islahatı konsepsiyasının müzakirəsi zamanı konsepsiya ilə müəyyən edilmiş konkret məsələlərlə bağlı çox ciddi dəstək aldıq – bu haqda Gürcüstanın təhsil, elm və gənclik naziri Qivi Mikanadze baş nazir və dövlət universitetlərinin rektorları ilə görüşdən sonra deyib.

Qivi Mikanadzenin qeyd etdiyi kimi, bu görüş baş nazir tərəfindən təqdim edilmiş konsepsiyanın müzakirəsini nəzərdə tutan prosesin davamıdır.

“Hər bir universitetin rektorunun mövqeyini dinlədik. Konsepsiyada təqdim olunan problemlər haqda danışarkən qeyd olundu ki, ali təhsil müəssisələrinin bu gün üzləşdiyi problemlər realdır. Konsepsiya ilə müəyyən edilmiş konkret addımlarla bağlı çox ciddi dəstək aldıq. Eyni zamanda, bu müzakirələrin davam edəcəyini bildirdik. Düşünürük ki, bu müzakirələr nəticəsində artıq yekun mövqeləri uzlaşdırmaq mümkün olacaq, bu, bizə əvvəlcə komissiyanın sənədi yekun şəkildə dəstəkləməsinə, daha sonra isə onun əsasında hökumət tərəfindən konsepsiyanın təsdiqlənməsinə və orada nəzərdə tutulmuş fəaliyyətlərin birbaşa həyata keçirilməsinə imkan verəcək. Bütün bunlar göstərir ki, hökumət başçısı və bütövlükdə hakimiyyət təhsil sisteminin keyfiyyətinin yüksəlməsinə böyük prioritet verir. Baş nazirin təşəbbüsü ilə başlayan bu vacib və həqiqətən fundamental proses əslində müzakirə prosesindədir və onun həyata keçirilməsinin ilk addımları tezliklə başlayacaq” – Qivi Mikanadze bildirib.

Gürcüstan hökumətinin məlumatına əsasən, İrakli Kobaxidze ali təhsilin keyfiyyətini keyfiyyətcə yüksəltmək məqsədi daşıyan konsepsiyanın istiqamətləri haqqında ətraflı danışıb. Gürcüstanın təhsil, elm və gənclik naziri Qivi Mikanadze, nazir müavini Zviad Qabisonia, Hökumət Administrasiyasının rəhbəri Levan Jorjoliani və təhsil islahatı məsələsi üzərində işləyən Ali Təhsil İslahatı üzrə Hökumət Komissiyasının katibi Levan İzoria görüşdə iştirak edirdilər.