Tbilisinin meri Kaxa Kaladzenin bu gün bələdiyyə hökumətinin iclasında verdiyi məlumata görə, Qəhrəmanlar Meydanında yerləşən estakadada planlı yoxlama və sınaq işləri aparılacaq.

Onun sözlərinə görə, bu proses estakadanın konstruktiv elementlərinin texniki baxışını, onların davamlılıq və funksionallıq dərəcəsinin qiymətləndirilməsini nəzərdə tutur.

“Nəqliyyat siyasəti bir çox mühüm komponentdən ibarətdir. İnfrastrukturun qurulması və küçələrin yenilənməsi-reabilitasiyası xüsusi yer tutur. Eyni zamanda, yeraltı kommunikasiyaların yenilənməsinə diqqət yetirilir. Müxtəlif rayonlarda və küçələrdə mövcud olan yeraltı kommunikasiyalar tələblərə cavab vermir. Buna görə də başladığımız hər bir layihədə ilk növbədə bu məsələni həll edirik. Körpülərin təhlükəsizliyi də olduqca önəmlidir və bu, müvafiq xidmətlər tərəfindən mütəmadi olaraq yoxlanılır. Monitorinqin məqsədi paytaxtda nəqliyyat infrastrukturunun təhlükəsiz və davamlı işləməsini təmin etməkdir,” – deyə Kaxa Kaladze bildirib.

Onun sözlərinə görə, Qəhrəmanlar Meydanındakı estakadada yoxlama və sınaq işləri 19 iyunda başlayacaq və 7 iyulda tamamlanacaq.

“Planlaşdırılmış işlərə görə, həmin dövrdə gecə saatlarında (02:00-dan 06:00-a qədər) Qəhrəmanlar Meydanı estakadasında avtomobil hərəkəti növbə ilə tamamilə məhdudlaşdırılacaq. Bu cür profilaktik tədbirlər potensial təhlükələrin qarşısının alınmasına xidmət edir,” – deyə Kaladze vurğulayıb.