Qazaxıstan dekabrın 25-də Azərbaycan Hava Yollarına məxsus təyyarənin qəzaya uğraması ilə bağlı ilkin rəyi dərc edib

 
Qazaxıstan dekabrın 25-də Azərbaycan Hava Yollarına məxsus təyyarənin qəzaya uğraması ilə bağlı ilkin rəyi dərc edib. Qazaxıstan mediasına əsasən, parçalanmamış fraqmentlərin üzərində ilkin yoxlama zamanı gövdənin quyruq hissəsində, təyyarənin şaquli stabilizatorunda, hündürlük və istiqamət sükanında metal yad cisimlərin vurduğu çox sayda müxtəlif ölçü və formada zədələr aşkar edilib.

İlkin məruzəyə əsasən, təyyarənin sol mühərrikində və sol qanadında, eləcə də təyyarənin aqreqatlarında və komponentlərində zədələr aşkar edilib.

Rus mediası da Qazaxıstanın ilkin hesabatı haqqında məlumat yayır. Məlumata əsasən, Qazaxıstanın hesabatında deyilir ki, hidravlika və elektrik naqilləri, ehtimal ki, xarici əşyalar səbəbindən yerə dəyməzdən əvvəl zədələnib.

Dekabrın 25-də Bakı-Qroznı reysini həyata keçirən Azərbaycan Hava Yollarına məxsus təyyarə Qazaxıstanın Aktau şəhəri yaxınlığında qəzaya uğrayıb. Təyyarədə 62 sərnişin və 5 ekipaj üzvü olub. Beynəlxalq Mülki Aviasiya Təşkilatının Konvensiyasına uyğun olaraq istintaqa Qazaxıstan rəhbərlik edir. İşlərdə Azərbaycan və Rusiyanın nümayəndələri, beynəlxalq ekspertlər, “Embraer” şirkətinin nümayəndələri iştirak edirlər. Təyyarənin qəzaya uğramasının səbəblərindən biri kimi rus hava hücumundan müdafiə sistemi göstərilir. Dekabrın 28-də Rusiyanın Prezidenti Vladimer Putin faciəvi insidentin Rusiyanın hava məkanında baş verdiyinə görə üzr istəyib. Azərbaycan tərəfinin qiymətləndirməsinə əsasən, radioelektron mübarizə Qroznıda təyyarənin naviqasiya sistemini bloklayıb.