“Qaxaria Gürcüstan Naminə” partiyası parlamentə daxil olmaq qərarını qəbul edib. Bu barədə “Qaxaria Gürcüstan Naminə” partiyasının siyasi şurasının üzvü Qiorqi Şaraşidze partiyada keçirilən brifinqdə deyib.

“Təəssüf ki, bu gün iki radikal tərəfin fərqli fikrə qarşı dözümsüzlüyünün bizi nifrət və qarşılıqlı qarşıdurmanın təhlükəli həddinə çatdırdığı və bütün ölkənin nifrət spiralına büründüyü bir vaxtda, hər şeydən çox müdrik, mötədil və bütün səviyyələrdə ardıcıl siyasətə qayıtmalıyıq! Parlament və şəhər məclislərinin tribunasından istifadə edilməməsi, xüsusilə də bu çətin dövrdə təkcə səhv deyil, həm də ölkə və xalq qarşısında cinayətdir. Gürcüstan Parlamentində Gürcüstan vətəndaşlarının səsi və fərqli fikri eşidilməlidir! Yalana həqiqətlə, mənfurluğa və nifrət dilinə müdrik, sakit, mötədil və ardıcıl addımlarla cavab verməyin vaxtıdır” – Qiorqi Şaraşidze bildirib.

Xatırladaq ki, parlament sentyabrın 2-də Qaxaria və onun 11 komanda yoldaşının əvəzediciləri – Qela Abuladze, Cemal Ananidze, Ketevan Bakaradze, Rusudan Tevzadze, Malxaz Toria, Şalva Kereselidze, Salome Kobaladze, Qiqa Parulava, Vika Pilpani, Qiorqi Şaraşidze, Tamar Xvedeliani və Sopio Xorquaninin deputatlıq səlahiyyətini tanıyıb.

“Qaxaria Gürcüstan Naminə” partiyası parlament siyahısını geri götürməyib. Məhz bu əsasda parlament çıxarılmış üzvlərin əvəzedicilərinin səlahiyyətinin tanınması məsələsinə baxıb.

Bundan əvvəl isə iyulun 2-də plenar iclasda Qiorqi Qaxaria və onun partiyasının 11 üzvü Teona Akubardia, Ana Buçukuri, Levan Qoqiçaişvili, Zaza Tavadze, Beka Liluaşvili, Natia Mezvrişvili, Berdia Sicinava, Kaxaber Kemoklidze, Roin Koçoraşvili, Dimitri Tskitişvili və Zviad Dzidziqurinin deputatlıq səlahiyyətinə xitam veriblər.

“Gürcü Arzusu” Qaxarianın partiya üzvlərinin deputatlıq səlahiyyətinə vaxtından əvvəl xitam verilməsinə səbəb kimi Gürcüstan Parlamentinin iclaslarında üzrlü səbəb olmadan iştirak etməməyi göstərib.