Qaçqınlar Agentliyi 300-ə qədər məcburi köçkün ailəsinə yaşayış evləri alacaq

Qaçqınlar Agentliyi 300-ə qədər məcburi köçkün ailəsinə bütün ölkə miqyasında yaşayış evləri alacaq. Qaçqınların məsələlərini öyrənən komissiyanın köçürülməsi barədə müsbət qərar qəbul etdiyi ailələrin siyahısı agentliyin veb-saytında artıq dərc olunub.

Agentliyin məlumatına əsasən, məcburi köçkün ailələrə evləri Gürcüstanın istənilən regionunda özlərinin seçməsi və agentliyə təqdim etməsi üçün altı aylıq müddət verilir.

Qeyd etmək lazımdır ki, məcburi köçkün ailələrin köçürülməsi məqsədilə yaşayış komplekslərinin tikintisi ilə yanaşı, evlərin satınalınması proqramı son dövrlərdə xüsusi miqyas alıb. Agentlik cari ildə artıq 1 640 məcburi köçkün ailəsinə ev alıb.

Məcburi köçkün ailələrin mənzillə təmin olunması prosesi gələcəkdə daha da aktiv rejimdə davam etdiriləcək.