Polşanın sabiq baş naziri Ukraynanın “Müdrik Yaroslav” ordenini Volin faciəsi muzeyinə bağışlayıb – “Qoy bu mükafat Volin qırğını zamanı qətlə yetirilmiş günahsız polşalıların xatirəsinin rəmzinə çevrilsin”

Polşanın sabiq baş naziri Mateuş Moravietski Ukraynanın “Müdrik Yaroslav” ordenini Volin faciəsi qurbanlarının xatirə muzeyinə bağışlayıb.

Moravietski, Ukraynada genişmiqyaslı müharibənin başlanğıcında aldığı “Müdrik Yaroslav” ordenini etiraz əlaməti olaraq geri verdiyini, lakin mükafatı Ukrayna tərəfinə qaytarmadığını bildirib.

“Bu muzeyi ziyarət edən hər kəsin – istər polşalı, istərsə də xarici qonaqların – Volin qırğınının amansızlığı və dəhşətli xüsusiyyətləri barədə düşünmək üçün əlavə bir səbəbi olsun. Qoy bu mükafat Volin qırğını zamanı vəhşicəsinə qətlə yetirilmiş on minlərlə günahsız polşalının xatirəsinin rəmzinə çevrilsin. Korrupsiyalaşmış Ukrayna elitası bunu edə bilmədiyi üçün, mən bunu onların əvəzinə edəcəyəm” — Moravietski izah edib.

Moravietskinin təşəbbüsü ilə “Banderizm”lə bağlı simvolların təbliğinə görə cəzanı nəzərdə tutan qanun layihəsinin müzakirəsi və qəbulu bərpa edilməlidir.

Məlumat üçün bildirək ki, Polşa Prezidenti Karol Navrotski, Ukrayna Prezidenti Volodimir Zelenskinin Ukrayna Silahlı Qüvvələrinin bölmələrindən birinə “Ukrayna Üsyançı Ordusu” adını verməsindən sonra onu “Ağ Qartal” ordenindən məhrum edib. Polşa mediasının yazdığı kimi, “Ukrayna Üsyançı Ordusu” 1943-cü ilin iyulunda keçmiş Volin voyevodalığına daxil olan, hazırda isə Ukrayna ərazisində yerləşən Volodimir, Horoxov, Kovel və Lutsk vilayətlərində polşalıların məskunlaşdığı təxminən 150 şəhərdə koordinasiyalı hücum həyata keçirib.

Ukraynanın xarici işlər naziri Andrei Sibiqa isə Volodimir Zelenski ilə həmrəylik əlaməti olaraq, 2022-ci ildə ona təqdim edilmiş “Polşa Respublikası qarşısında xidmətlərinə görə” ordeninin Komandor Xaçından imtina edib. Sibiqanın ardınca Ukraynanın sabiq prezidentləri Viktor Yuşenko, Leonid Kuçma və Petro Poroşenko da Polşanın mükafatlarından imtina etdiklərini bildiriblər.