Polşada ukraynalı cütlüyə ehtimal ki, ləhcələrinə görə hücum ediblər

Polşanın Vrotslav şəhərində gənc ukraynalı cütlüyə hücum ediblər. Hüquq-mühafizə orqanları baş vermiş faktı araşdırırlar. Bu barədə “Radio Wrocław” xəbər verir.

Media, insidentin bazarı günü, iyulun 26-da Vrotslavın Zakşuv rayonunda baş verdiyinə dair məlumat verir. Ukraynalılar öz evlərinin yaxınlığında yerləşən mağazada olublar. Yayılan məlumata əsasən, mağazadan çıxdıqdan sonra bir neçə kişi onları təqib etməyə başlayıb. Məlum olduğu kimi, hücumun ehtimal edilən səbəbi onların “ləhcəsi” olub. Əvvəlcə onlar kişiyə hücum edərək onu yerə yıxıb və ayaqları ilə döyüblər. Qadın ona kömək etməyə çalışdıqda, hücumçular onun da üz və baş nahiyəsinə bir neçə zərbə endiriblər. Hücumçular hadisə yerindən qaçıblar.

Xəsarət alanlar təcili tibbi yardım briqadası tərəfindən xəstəxanaya çatdırılıb. Həkimlər hər ikisində beyin silkələnməsindən şübhələnirlər. Hücum zamanı aldığı qulaq xəsarəti səbəbindən qadına tikişlərin qoyulması da lazım gəlib.

İnsident təhlükəsizlik kamerası vasitəsilə lentə alınıb. Vrotslav polisi işi araşdırır və hücumçuların şəxsiyyətini müəyyənləşdirərək onları saxlamağa çalışır.