“Politico” – Fransız qoşunları Avropada düşmənə qarşı yüksək intensivli münaqişəyə hazırlaşırlar

Fransız qoşunları Avropada düşmənə qarşı yüksək intensivli münaqişəyə hazırlaşırlar – bu barədə “Politico” yazır.

Nəşrin məlumatına görə, Fransa ordusunun bölmələri şəraitin real döyüş meydanına mümkün qədər yaxın olduğu Fransanın şərqində yerləşən döyüş hazırlığı mərkəzində təlim keçir. 120 kvadrat kilometrlik (Parisdən böyük) düşərgə Fransada unikaldır. Bu, Fransa ordusunun müxtəlif hissələrinin – adətən ölkəyə səpələnmiş piyada, zireh, artilleriya və mühəndislərin birlikdə məşq edə biləcəyi yeganə yerdir.

Zabitlər potensial rəqiblərin adlarını açıqlamasalar da, təlim Rusiya kimi düşmənlə döyüşmək üçün qoşun hazırlamaq məqsədi daşıyır. Fransa ordusu Afrikada onilliklər boyu davam edən hərbi əməliyyatlardan sonra Fransanın getdikcə Avropanın şərq cinahına diqqət yetirdiyini bildirir.

“Politico” həmçinin Almaniyanın müqaviməti fonunda Fransanın potensial olaraq Ukraynaya Qərb qoşunlarını göndərməyə açıq olan ölkələrin ittifaqını yaratdığını yazır. Nəşrin məlumatına əsasən, Baltikyanı ölkələrin və Ukraynanın xarici işlər nazirləri ilə görüşdə Fransa Xarici İşlər Nazirliyinin rəhbəri Stefan Sejourne növbəti aylarda heç nəyi istisna etmədiyini bildirib.