“Politico” – Avropa Komissiyası İordan çayının qərb sahilində yerləşən qeyri-qanuni İsrail yaşayış məskənlərindən Avropa İttifaqına idxalı azaltmaq məqsədilə sərt tədbirlərin görülməsini nəzərdən keçirir

Avropa Komissiyası İordan çayının qərb sahilində yerləşən qeyri-qanuni İsrail yaşayış məskənlərindən Avropa İttifaqına idxalı azaltmaq məqsədilə sərt tədbirlərin görülməsini nəzərdən keçirir – bu başlıqla “Politico” nəşri məqalə dərc edir.

“Politico”nun məlumatına əsasən, Avropa Komissiyasının sənədində qeyd olunur ki, nəzarətin gücləndirilməsi yeni hüquqi mexanizmlər qəbul edilmədən, Avropa İttifaqında qüvvədə olan qaydaları pozaraq daxil olan məhsulların idxalını azalda bilər.

“Bir neçə variant, o cümlədən İordan çayının qərb sahilindəki qeyri-qanuni İsrail yaşayış məskənlərindən Avropa İttifaqına məhsul ixracı üçün xüsusi icazənin tələb olunacağı idxal lisenziyalaşdırılması sisteminin tətbiqi; bu yaşayış məskənlərində istehsal olunan məhsullara əlavə tariflərin qoyulması və ya yaşayış məskənlərindən idxalın tamamilə qadağan edilməsi nəzərdən keçirilir” – “Politico” yazır.

“Politico”nun məlumatına əsasən, qeyd olunan təkliflər Avropa İttifaqının xarici siyasət üzrə ali nümayəndəsi Kaia Kalasın tələbi ilə hazırlanıb. Məsələ ötən ay Lüksemburqda Avropa İttifaqının xarici işlər nazirlərinin görüşündə də müzakirə olunub.

Hərçənd, Avropa İttifaqının yüksək rütbəli rəsmilərindən biri bu təşəbbüsü tənqid edərək onu rəmzi addım adlandırıb.

“Bu mərhələdə yalnız rəmzi tədbirlərin görülməsi çox azdır və çox gecikib. Üstəlik, İsraildəki seçkilər öncəsi bu, yalnız İsrailin sərt xətt tərəfdarı olan nazirlərinin yaymağa çalışdığı ritorikanı gücləndirir” – Avropa İttifaqının nümayəndəsi bildirib.