ABŞ Prezident Administrasiyası İran parlamentinin spikeri Mohamad Baqer Qalibafini danışıqlar prosesində mümkün tərəfdaş və İranın ehtimal olunan gələcək lideri olaraq nəzərdən keçirir. “Politico” bu haqda məlumatı öz mənbələrinə istinadən yayır.

Məqalədə qeyd olunub ki, ABŞ administrasiyasında bir neçə namizədi “sınaqdan keçirməyi” planlaşdırırlar, hərçənd son qərar verilməyib. “Politico”nun məlumatına əsasən, İran şahının oğlu Reza Pehlevi namizədlər arasında deyil.

“Politico”nun mənbələrinin dediyi kimi, Ağ Evdə İran üçün “Venesuela ssenarisi”ni, daxili dəstəyə malik və eyni zamanda ABŞ-a da sadiq olan bir siyasətçinin hakimiyyətə gəlməsini nəzərdən keçirirlər.

Donald Trampın administrasiyasında Pehlevinin İranda real legitimliyə malik olacağına inanmırlar.

Eyni zamanda, ekspertlər Qalibafinin namizədliyinə şübhə ilə yanaşırlar.

“Qalibafi iddialı və praqmatikdir, lakin eyni zamanda İslam nizamının qorunub saxlanmasına prinsipial olaraq sadiqdir” – Beynəlxalq Böhran Qrupunun İran məsələləri üzrə baş analitiki Ali Vaezi “Politico” ilə söhbətində deyib.

Mohamad Baqer Qalibafi İran-İraq müharibəsi zamanı İslam İnqilabı Keşikçiləri Korpusunda xidmət edirdi. 1999-cu ildə İran polisinin rəisi təyin edilib. O, 2005-2017-ci illərdə Tehranın meri idi. 2020-ci ildən isə İranın birpalatalı parlamenti olan Məclisin spikeri vəzifəsini tutur.

“Jerusalem Post” nəşri Qalibafinin ABŞ ilə danışıqlarda iştirak etdiyini və bundan sonra da Donald Trampın İranın elektrik stansiyalarına planlaşdırılan zərbələri beş gün təxirə saldığını yazırdı. Tehran danışıqlar faktını təkzib edir.