Polis Kvemo Kartlidə oğurluq faktlarını açıb, dörd nəfər saxlanılıb

Polis Kvemo Kartlidə oğurluq faktlarını açıb. Qardabani və Marneuli rayon idarələrinin əməkdaşları əvvəlcədən əlbir olan qrup tərəfindən törədilmiş, xeyli ziyanla nəticələnən oğurluq ittihamı ilə dörd nəfəri saxlayıblar: 2007-ci il təvəllüdlü İ.İ., 2006-cı il təvəllüdlü L.Q., 2007-ci il təvəllüdlü E.A. və 2006-cı il təvəllüdlü A.M.

İstintaqla müəyyən edilib ki, təqsirləndirilən şəxslər Qardabani və Marneuli bələdiyyələri ərazisində müxtəlif vaxtlarda sürətli ödəniş terminallarını oğurlayıb, oradan 10 000 lariyə qədər pul vəsaitini ələ keçiriblər.

Hüquq-mühafizə orqanlarının əməkdaşları həyata keçirilmiş istintaq tədbirləri nəticəsində cinayəti törədən şəxsləri hadisədən qısa müddət sonra saxlayıblar.

Fakt üzrə araşdırma Cinayət Məcəlləsinin 177-ci maddəsinin 2-ci və 3-cü hissələri ilə aparılır ki, bu da 7 ilədək azadlıqdan məhrumetmə cəzasını nəzərdə tutur.