Macarıstanın xarici işlər naziri Peter Siyarto Avropa liderlərini Rusiya–Ukrayna müharibəsinin eskalasiyası riski ilə bağlı tənqid edib.

Siyarto bildirib ki, Brüsseldə sağlam düşüncə tamamilə itib və Avropa liderlərini müharibə fanatizmində ittiham edib.

“Ötən həftəsonu Paris razılaşması ictimaiyyətə açıqlandı. Buna əsasən, Avropanın iki nüvə dövləti Ukraynaya qoşun göndərmək qərarına gəlib. Bu, faktiki olaraq Avropanın nüvə dövlətlərinin müharibəyə qoşulmağa başladığı və məqsədlərinin müharibəni bütün Avropaya yaymaq olduğu anlamına gəlir. Brüsselin hərbi siyasəti Macarıstanı çox böyük təhlükə altına salır”, – deyə Peter Siyarto bildirib.

Macarıstanın xarici işlər nazirinin sözlərinə görə, Brüssel “Macarıstanı Kiyevin hərbi planına cəlb etməyə hazırdır”.

“Ukraynada dövlət siyasəti sərt şəkildə anti-macarıstandır. Brüssel və Kiyevin planının mahiyyəti Macarıstanı müharibəyə cəlb etməkdir. Son dörd il ərzində kənarda qalmağı bacardıq. Bunun üçün hər gün mübarizə aparmalı olduq və siyasi təzyiqləri rədd etdik”, – deyə Macarıstanın xarici işlər naziri qeyd edib.