Vətəndaş cəmiyyətini məhdudlaşdıran və vizasız rejimin tələblərinə uyğun olmayan qanunlar qəbul edilib – bu barədə Almaniyanın Gürcüstandakı səfiri Peter Fişer 17 ölkənin xarici işlər nazirləri və Avropa İttifaqının ali nümayəndəsinin birgə bəyanatını jurnalistlərə şərh edərkən deyib.

“Gürcüstan nə edəcəyini dəqiq bilir. Avropa İttifaqı yazılı qaydalarla idarə olunur. Hər şey dəfələrlə yazılıb. Vətəndaş cəmiyyətini məhdudlaşdıran və vizasız rejimin tələblərinə uyğun olmayan qanunlar qəbul edilib. Burada azlıqları məhdudlaşdıran və Avropa İttifaqının standartlarına uyğun olmayan qanunlar qəbul edilib. Düşünürəm ki, bu, məktubun əsas məzmunudur” – Peter Fişer bildirib.

17 ölkənin xarici işlər nazirləri və Avropa İttifaqının ali nümayəndəsi Gürcüstanla bağlı birgə bəyanat yayıblar. Bəyanatın müəllifləri Gürcüstan hakimiyyətini “haqsız yerə saxlanılmış siyasətçiləri, jurnalistləri və fəalları dərhal azad etməyə, repressiv qanunvericiliyi ləğv etməyə və bütün müvafiq tərəflərlə milli dialoqa qoşulmağa” çağırırlar.