Pedro Sançes partiyasındakı korrupsiya haqqında heç nə bilmədiyini bəyan edir

İspaniyanın Baş naziri Pedro Sançes partiyasındakı korrupsiya haqqında heç nə bilmədiyini bəyan edir. Bu haqda Sançes Deputatlar Konqresində çıxış edərkən danışıb.

Sançes “cəmiyyətin məhkəmə sahəsi ilə bağlı xəbərləri izlədiyini” anladığını bildirib.

“Heç bir halda onların əhəmiyyətini kiçiltmirəm. Ölkəmizdə məhkəmə proseslərindən kənarda nələrin baş verdiyini anlamaq üçün bu, həlledicidir. Bununla yanaşı, yadda saxlamalıyıq ki, bu məlumatın yayılmasının arxasında insanların fikrini qarışdırmaq üçün mövzuları bir-birinə qatmağa çalışan siyasi aktorlar dayanır” – Sançes bildirib.

Sançes Sosialist Partiyasının qanunsuz maliyyələşmə almasını təkzib edib. O, həmçinin partiyada korrupsiyaya dözümlülük nümayiş etdirməyəcəyini bildirib.

“Mən bu cür hallardan heç vaxt xəbərdar olmamışam və heç bir halda buna icazə verməzdim” – İspaniyanın Baş naziri qeyd edib.

Sançes 32 dəqiqəlik çıxışının bir hissəsini həyat yoldaşı və qardaşının adının keçdiyi, xidməti səlahiyyətlərdən mümkün sui-istifadə halları ilə bağlı aparılan işlərə də həsr edib.

“Bu barədə danışmaq mənim üçün asan deyil, çünki söhbət ən çox sevdiyim insanlardan gedir. Heç bir şübhə olmadan bilirəm ki, bu işlər əsassız ittihamlara və digər Qərb ölkələrində də şahidi olduğumuz təqib sxeminə əsaslanır” – Pedro Sançes bildirib.

Məlumat üçün bildirək ki, iyunun 22-də İspaniyanın Baş nazirinin xanımı Beqoniya Qomes davam edən istintaq çərçivəsində pasportunun müsadirə olunması məsələsinin müzakirəsi üçün məhkəməyə çağırılıb.