Son dövrlərdə Avropa İttifaqı tərəfindən Gürcüstana verilən tövsiyələrin məzmunu gürcü cəmiyyəti və Ortodoks Kilsəsi daxilində ciddi narahatlığa səbəb olur – bu barədə Patriarxlığın bəyanatında qeyd olunub.

Patriarxlığın bəyanatında deyildiyi kimi, “Ailə müqəddəsliyinin qorunması və yetkinlik yaşına çatmayanlara qarşı dırnaqarası LGBT təbliğatını məhdudlaşdıran qanunvericiliyin ləğvi tələbini nəzərdə tutan hissədən söz gedir”.

“Bu yanaşma həm Avropa İttifaqı ölkələrinin nümayəndələri, həm də yüksək rütbəli diplomatlar tərəfindən Gürcüstanın Ortodoks Kilsəsinin yüksək rütbəli din xadimləri ilə keçirilən çoxsaylı görüşlərdə yayılan prinsiplər və bəyanatlarla tamamilə ziddiyyət təşkil edir. Onların tərəfindən hər zaman aydın şəkildə izah olunmuşdu ki, Gürcüstanın Avropa strukturlarına inteqrasiya prosesi qeyri-ənənəvi həyat tərzinin təbliğinin təşviqi ilə əlaqəli deyil.

Ümumi Gürcüstanın katolikos-patriarxı II İlia ilə görüşlərdə (bunların qeydləri də mövcuddur) hər zaman aydın şəkildə deyilirdi ki, xristian və ənənəvi ailə dəyərlərini qorumaq gürcü xalqının iradəsidir. Həmçinin deyilirdi ki, ölkənin Avropa strukturlarına üzvlük yolunda ənənələrimizə zidd olan qəti tələb və hər hansı öhdəlik qoyulmayacaq.

Əlahəzrət II İlia dəfələrlə qeyd etmişdir ki, Avropa seçimi o şəraitdə həyata keçirilə bilər ki, bizə tanrının əleyhinə olan təlimlər zorla təlqin edilməsin, məsələn, qeyri-ənənəvi həyat tərzinin təbliği kimi. Bütün bunların fonunda, yetkinlik yaşına çatmayanların LGBT təbliğatından qorunması ilə bağlı qanunların ləğvini birbaşa və ya dolayısı ilə nəzərdə tutan avropalıların indiki tövsiyələrinə belə müddəaların daxil edilməsi böyük məyusluq doğurur, təkcə tanrının təlimlərinə və xristianlığın əsaslarına deyil, həm də keçmişdə tərəfdaş ölkələrlə münasibətlərdə dəfələrlə verilmiş şifahi və yazılı vədlərə tamamilə ziddir.

Qeyd olunmalıdır ki, vaxtilə ailə dəyərləri və qeyri-ənənəvi həyat tərzinin təbliğindən gənclərin qorunması ilə bağlı qanunları mömin cəmiyyət tam dəstəkləmiş və kilsə hakimiyyətə minnətdarlığını bildirmişdi. Bu gün də mövcud şəraitdə mömin cəmiyyət hesab edir ki, sağlam ictimai həyat tərzinin möhkəmləndirilməsi üçün bu qanunlar hərtərəfli adekvatdır.

Təəssüf ki, Avropa İttifaqının son tövsiyələri bir tərəfdən, ailə dəyərlərinin dəstəklənməsi və yeniyetmələrin LGBT təbliğatından qorunması, digər tərəfdən isə ölkənin Avropaya can atması perspektivi ilə bağlı bu gün artıq açıq şəkildə bir-biri ilə uzlaşmayan mövqeləri ortaya qoyur, bu isə Gürcüstan əhalisinin böyük hissəsində məyusluğa səbəb olur” – Patriarxlığın bəyanatında qeyd olunub.