Parlament üçüncü oxunuşda qanun layihəsini qəbul edib. Layihəyə əsasən, əmlak vergisini yalnız illik gəliri 100 min lari və daha çox olan şəxslər ödəyəcək

Parlament “Gürcüstan Vergi Məcəlləsinə dəyişiklik edilməsi haqqında” qanun layihəsini üçüncü oxunuşda 91 səslə qəbul edib.

Üçüncü oxunuşda qəbul edilən qanun layihəsinə əsasən, hazırda qüvvədə olan çoxpilləli sistem – 40 min lari həddi və müvafiq dərəcələr ləğv edilir. Əvəzində 100 min lari məbləğində vahid gəlir həddi müəyyən edilir. Bu hədd çərçivəsində fiziki şəxs əmlak vergisindən tam azad edilir.

Qanun layihəsini parlamentin plenar iclasında Maliyyə-Büdcə Komitəsinin sədri Paata Kvijinadze təqdim edib.

Parlament çoxluğunun təşəbbüsü ilə hazırlanmış qanun layihəsinə əsasən, 81 min ailə əmlak vergisindən azad ediləcək.

Sürətləndirilmiş qaydada tələb olunan qanun layihəsi dərc olunan kimi qüvvəyə minəcək.

Sözügedən dəyişiklik Vergi Məcəlləsinə əsasən, 2026-cı ildə bəyan edilməli olan əmlak vergisinə şamil ediləcək.