Parlament narkotik və digər qadağan olunmuş maddələrin qanunsuz daşınmasının qarşısını alma mexanizmlərinə aid “Gömrük Məcəlləsi”nə dəyişikliyi 80 səslə, birinci oxunuşda sürətləndirilmiş
qaydada qəbul edib.

Məruzəçi, daxili işlər nazirinin müavini Aleksandre Daraxvelidzenin bəyan etdiyi kimi, dəyişiklik sərhəd buraxılış məntəqələrində, limanlarda və hava limanlarında, eləcə də poçt göndərişləri üçün nəzərdə tutulmuş məntəqələrdə Mərkəzi Cinayət Polisi Departamenti və Gömrük Departamentinin nümayəndələrindən ibarət birgə qrupların yaradılmasını nəzərdə tutur.

Onun sözlərinə əsasən, qeyd olunan qrupların əsas məqsədi ölkəyə daxil olan və çıxan yüklərə nəzarət etmək və bütün şübhəli göndəriş və ya yükləri yoxlamaq olacaq.

“Bundan başqa, vahid mərkəzləşdirilmiş sistem yaradılacaq, burada sənəd əsasında şübhəli yüklərin əvvəlcədən yoxlanışı həyata keçiriləcək. Qanuna dəyişikliyin məqsədi Gürcüstanın narkotiklər və digər qanunsuz əşyalar üçün tranzit zonası kimi istifadə edilməməsi üçün effektiv yük nəzarəti sistemi yaratmaqdır” – Aleksandre Daraxvelidze qeyd edib.

Həmçinin, qanun layihəsi nəqliyyat vasitələri ilə bağlı müəyyən xidmətlər üçün rüsumların artırılmasını nəzərdə tutur. Dəyişikliklər yalnız o hallara aiddir ki, nəqliyyat vasitəsi Gürcüstana müvəqqəti hərəkət üçün daxil olur və ya ölkədən ixrac/re-ixrac üçün çıxır. Tranzit nömrələrin verilməsi, ekspert yoxlamaların aparılması və müvafiq gömrük-administrativ sənədlərin hazırlanması üçün ödənişlər artırılır.

Gürcüstan hökuməti qanun layihəsinin təşəbbüskarıdır, müəllifi isə Daxili İşlər Nazirliyidir.