Parisdə “İstəklilər Koalisiyası”nın görüşü başa çatdı, Volodimir Zelenski Yelisey Sarayını tərk etdi. Yaxın vaxtlarda ABŞ Prezidenti Donald Trampla avropalı liderlərin telefon danışığı planlaşdırılır. Ukraynanın “Europeiskaya Pravda” nəşrinin yazdığı kimi, bu barədə ona Yelisey Sarayında məlumat veriblər.

Yayılmış məlumatlara əsasən, Trampla söhbətdə avqustun 18-də onunla görüşmək üçün Vaşinqtonda olan avropalı liderlər iştirak edəcəklər.

Həmçinin, mövcud məlumata əsasən, Donald Trampla telefon danışığından əvvəl Ukrayna Prezidenti bu gün ABŞ Prezidentinin xüsusi nümayəndəsi Stiv Uitkofla görüş keçirəcək. Stiv Uitkof bu gün “İstəklilər Koalisiyası”nın görüşündə iştirak edirdi, lakin daha sonra görüşü tərk etdi. Yelisey Sarayında başqa görüşə görə bunun belə planlaşdırıldığını bildiriblər.

“İstəklilər Koalisiyası”nın görüşündə 30-dan çox ölkənin nümayəndəsi iştirak edirdi. Danışıqlarda Emmanuel Makrondan başqa, Avropa İttifaqına üzv ölkələrin altı lideri – Belçika, Niderland, Danimarka, Finlandiya, Polşa və İspaniyanın liderləri, eləcə də Avropa Komissiyasının prezidenti, Avropa Şurasının prezidenti və Ukrayna Prezidenti şəxsən iştirak edirdilər.

NATO-nun baş katibi və Almaniya, İtaliya, Britaniya, Kanada, Yaponiya və Avstraliya da daxil olmaqla 20-yə yaxın ölkənin lideri görüşə uzaqdan qatılıb.