Nino Tsilosani bildirib ki:

“Təəssüf ki, Avropa İttifaqının bir sıra institutları getdikcə Sovet İttifaqına bənzəməyə başlayır.”

O, bu fikirləri Avropa Parlamentinin “İmedi”, “Rustavi 2” və “Post TV” telekanallarının akkreditasiyasını bir il müddətinə dayandırması ilə bağlı sualı cavablandırarkən deyib.

Tsilosani qeyd edib ki, Avropa Parlamentinin qərarı azad sözün boğulması və müstəqil media orqanlarının susdurulması cəhdidir:

“Bu, Avropa Parlamentinin divarları daxilində üç gürcü müstəqil media orqanına bir il fəaliyyət qadağası qoymaqla azad sözü susdurmaq cəhdindən başqa bir şey deyil.”

Onun sözlərinə görə, son dövrlərdə Avropa İttifaqının və xüsusilə Avropa Parlamentinin “hansı istiqamətə getdiyi açıq görünür”.

O həmçinin bildirib ki, bu institut dəfələrlə ədalətsiz qətnamələrlə yadda qalıb və indi “senzura ilə” fərqlənir. Tsilosani əlavə edib ki, ABŞ prezident administrasiyası və bir sıra siyasi liderlər də bu barədə danışıb, lakin Gürcüstan mediasına qarşı atılan addımlar “bütün standartları aşır”.