Nikoloz Samxaradze – Marta Kosun açıqlaması qəribə idi, Avropa İttifaqının namizəd ölkəyə hansı ölkənin hökuməti ilə dostluq əlaqələri qurmalı olduğunu diktə etmək hüququ yoxdur

„Avropa İttifaqının namizəd ölkəyə hansı ölkənin hökuməti və ya administrasiyası ilə dostluq əlaqələri qura biləcəyini diktə etmək hüququ yoxdur“, – bunu Gürcüstan parlamentinin Xarici Əlaqələr Komitəsinin sədri Nikoloz Samxaradze Gürcüstanın Birinci Kanalına açıqlamasında bildirib.
Samxaradze Avropa Komissiyasının genişlənmə məsələləri üzrə komissarı Marta Kosun „Avropa İttifaqına üzv olmaq istəyən ölkələr üzvlüyə nail olmaq üçün Donald Trampın MAGA hərəkatı ilə əlaqələrini kəsməlidirlər“ açıqlamasını şərh edib.

„Bu halda söhbət Avropa İttifaqının əsas tərəfdaşı və Avropada təhlükəsizliyin başlıca qarantı olan Amerika Birləşmiş Ştatlarından gedir. Buna görə də Marta Kosun açıqlaması qəribə idi. Marta Kos Avropa İttifaqına üzv ölkələrdən danışmayıb. Halbuki həmin ölkələrin Amerika administrasiyası ilə əlaqələri ola bilər. Burada da ölkələrin birinci və ikinci dərəcələrə bölündüyünü görürük. Məlum olur ki, Avropa İttifaqının üzvü olan ölkənin Amerika ilə münasibət saxlamasına icazə verilir, namizəd ölkəyə isə Amerika hökuməti ilə dostluq etmək qadağandır.

Bu, Avropa İttifaqı üçün pis haldır. Çünki namizəd ölkələrdə qəzəb və narazılıq yaradır, daha da önəmlisi, Avropa İttifaqının imicinə zərər vurur və insanlarda belə bir təsəvvür yaradır ki, Avropa İttifaqı əslində genişlənmək istəməyə də bilər“, – Nikoloz Samxaradze bildirib.