Nikoloz Samxaradze bildirib ki, Şalva Papuaşvilinin rəhbərliyi ilə parlament nümayəndə heyəti Belçika və Lüksemburqa səfər edəcək

Gürcüstan parlamentinin Xarici Əlaqələr Komitəsinin sədri Nikoloz Samxaradzenin məlumatına görə, parlament sədri Şalva Papuaşvilinin rəhbərliyi ilə parlament nümayəndə heyəti Belçika və Lüksemburqa səfər edəcək.

Samxaradzenin sözlərinə görə, səfər çərçivəsində avropalı həmkarlarla görüşlər keçiriləcək.

“Xatırlayırsınızsa, mən və Levan Maşaveli Belçika və Lüksemburqda səfərdə olmuş, parlament nümayəndə heyətinin tərkibində görüşlər keçirmişdik. Həmin səfər zamanı parlament sədrinin Belçika və Lüksemburqa səfəri planlaşdırıldı.

Bu, bizim üçün həm belçikalı, həm də lüksemburqlu deputatlarla qarşılaşdığımız problemlər, eləcə də Avropa İttifaqı ilə bağlı narahatlıqlarımız barədə danışmaq üçün yaxşı imkandır. Təbii ki, onların mesajlarını dinləyəcəyik və ölkəmizin baxışları barədə danışacağıq.

Hesab edirəm ki, belə bir səfər vacibdir və avropalı həmkarlarımız qarşısında mövqeyimizi və səsimizi çatdırmaq üçün imkan yaradır.

Bu, sizin soruşduğunuz Kaya Kallas deyil ki, “niyə sizinlə danışmırlar?” Onlar Gürcüstan hökumətini bəyənmirlər. Biz isə Belçika və Lüksemburq hökumətləri ilə görüşəcəyik”, – deyə Samxaradze bildirib.