Ermənistanın baş naziri Nikol Paşinyan yeni katolikos seçkilərinin təşkili üçün əlaqələndirici qrupun yaradılması təşəbbüsü ilə çıxış edib. Bu barədə o, “Facebook” sosial şəbəkəsində yazıb.

“Fəal addımlar atmalıyıq Müqəddəs Etchmiadzin Patriarxlıq otaqlarının azad olunması və yeni katolikos seçkilərinin təşkili istiqamətində. Hazırkı mərhələdə biz gündəlikdəki təşkilati məsələlərin həlli üçün əlaqələndirici qrup yaratmalıyıq,” – deyə Paşinyan qeyd edib.

Onun sözlərinə görə, bu əlaqələndirici qrupa Ermənistan Apostol Kilsəsinin sadiq üzvləri daxil ola bilərlər – həm ruhani, həm də mülki şəxslər. Onların İsa Məsihə ürəkdən inanması, həyatda heç olmasa bir dəfə Bibliya oxuması, son beş ildə azı bir dəfə Böyük Orucu tutması, hər gün dua etməsi və Müqəddəs Etchmiadzin Patriarxlığının yenilənməsi gündəliyinin Ermənistan Apostol Kilsəsinin, erməni xalqının və Ermənistan dövlətinin maraqlarına xidmət etdiyinə inanmaları əsas götürüləcək.

Nikol Paşinyan əlavə edib ki, əlaqələndirici qrupun ilk on üzvünü özü təyin edəcək. Sonrakı mərhələdə isə qrup öz strukturunu, genişlənmə qaydalarını və digər məsələləri özü müəyyən edəcək.

Xatırladaq ki, Ermənistanın baş naziri Nikol Paşinyan bildirir ki, II Qaregin subaylıq andını pozub və övladı var. Paşinyanın iddiasına görə, Ermənistan Apostol Kilsəsinin kanonik hüququna əsasən, II Qaregin nə yepiskop, nə baş yepiskop, nə də katolikos ola bilərdi və indi də olmamalıdır.

“Bu bir faktdır və əgər hər şeyi inkar etməyə çalışsa, mən bunu lazım olan formatda sübut edəcəyəm,” – deyə Ermənistanın baş naziri Nikol Paşinyan bildirib.