Nikol Paşinyan İohan Vadepul ilə görüşüb
Ermənistanın Baş naziri Nikol Paşinyan Almaniyanın xarici işlər naziri İohan Vadepul ilə görüşüb. Görüşdə Paşinyan Ermənistan və Almaniya arasındakı münasibətlərin yüksək səviyyəsini, eləcə də demokratik islahatların həyata keçirilməsi və Ermənistanla Avropa İttifaqı arasında əlaqələrin dərinləşdirilməsi prosesində Almaniyanın dəstəyinin əhəmiyyətini vurğulayıb.
Ermənistanın Baş nazirinin bəyanatına əsasən, Avropa İttifaqına üzv ölkələr arasında Almaniya Ermənistanın əsas tərəfdaşlarından biridir, iki ölkə arasında siyasi dialoq isə fəal və müntəzəm şəkildə davam edir.
Öz növbəsində, Vadepul Ermənistanla münasibətlərin gələcək inkişafına hazır olduğunu təsdiqləyib. Almaniyanın xarici işlər naziri Ermənistan və Avropa İttifaqı arasında əməkdaşlığın genişləndirilməsinin əhəmiyyətindən danışıb.
Bununla yanaşı, Vadepul Ermənistan və Azərbaycan arasında sülhün bərqərar olmasının əhəmiyyətini vurğulayıb və formalaşmış konstruktiv ab-havanın regional əlaqələrin güclənməsinə və əməkdaşlığın inkişafına dəstək verəcəyinə əminliyini ifadə edib.
Görüş zamanı tərəflər həmçinin Ermənistan və Almaniya arasında müxtəlif sahələrdə, o cümlədən yaşıl energetika istiqamətində əməkdaşlığın dərinləşdirilməsi imkanlarını müzakirə ediblər. Ermənistan və Avropa İttifaqı arasında ticarət-iqtisadi əlaqələrin inkişafına və Ermənistan iqtisadiyyatının şaxələndirilməsi məqsədilə atılan addımlara toxunulub. Bununla yanaşı, tərəflər regional vəziyyət və cari proseslər barədə fikir mübadiləsi aparıblar.