Nikol Paşinyan – Əvvəllər əməkdaşlığın 85-90 faizi bir ölkə ilə həyata keçirilirdisə, indi biz Gürcüstan, Çin, Fransa, Niderland və digər ölkələrlə münasibətləri inkişaf etdiririk

Xarici siyasətin vektorlarının və əlaqələrin şaxələndirilməsi Ermənistanın balanslaşdırma siyasətinin əsas elementləridir. Bunu Ermənistanın Baş naziri Nikol Paşinyan bildirib.
İnteqrasiya prosesləri, Avrasiya İqtisadi Birliyinə üzv ölkələrin Avropaya inteqrasiya məsələsinə münasibəti ilə bağlı suala cavab verən Nikol Paşinyan bildirib ki, tərəfdaşların bəyanatları ultimatum kimi qəbul edilməməlidir.
“Avrasiya İqtisadi Birliyi ölkələri liderlərinin referendum keçirilməsi ideyasını dəstəkləmələri tələb deyil, dostluq jestidir. Referendumun müəyyən mərhələdə zəruri olması fikri bizə məxsusdur. Tərəfdaşlarımızın bu mövqeyi bölüşməsindən və Ermənistanın Avropa gündəliyinə qarşı çıxmamalarından məmnunuq. Beynəlxalq münasibətlərdə dövlətlər öz maraqlarını daim ifadə edirlər və bu, normal prosesdir”, – deyə Ermənistanın Baş naziri qeyd edib.
Paşinyanın sözlərinə görə, hazırkı kursla əvvəlki siyasət arasındakı əsas fərq birtərəfli yanaşmanın tamhüquqlu çoxvektorlu əməkdaşlıqla əvəz edilməsidir.
“Əvvəllər bizim yalnız bir istiqamətdə strateji əməkdaşlığımız var idi. Bu gün biz Gürcüstan, Çin, Fransa, Niderland, Qazaxıstan və digər ölkələrlə münasibətlər qurur və inkişaf etdiririk. Bu balanslaşdırma hərbi-texniki sahədə də açıq şəkildə özünü göstərir. Əvvəllər əməkdaşlığın 85-90 faizi bir ölkə ilə həyata keçirilirdisə, indi onlarla tərəfdaşla əməkdaşlıq edirik. May ayında keçirilən paradda yeddi müxtəlif ölkədən gətirilmiş texnika və silahların nümayiş etdirilməsi bu şaxələndirməni açıq şəkildə əks etdirir”, – deyə Nikol Paşinyan bildirib.