Nikol Paşinyan – Ermənistanın Azərbaycana hücum etmək niyyəti, məqsədi və planı yoxdur və bu yolla getməyəcək

 
Ermənistanın Azərbaycana hücum etmək niyyəti, məqsədi və planı yoxdur və bu yolla getməyəcək – bu haqda Ermənistanın Baş naziri Nikol Paşinyan erməni nəşri “Armenpress”ə müsahibəsində deyib.

Ermənistan hökumətinin başçısı bildirib ki, Azərbaycan Ermənistana hücum etməyi planlaşdırmırsa, o zaman regionda eskalasiya ehtimalı sıfıra bərabərdir. Paşinyan Ermənistanın heç bir ölkə ilə silahlanma yarışında olmadığını və yalnız ölkənin sərhədlərini və ərazi bütövlüyünü qorumaq üçün silah aldığını deyib.

“Ordu islahatı bizim legitim hüququmuzdur. Bu, Azərbaycan üçün təhlükədirmi? Xeyr, çünki biz Azərbaycanın ərazi bütövlüyünü, Sovet Azərbaycanının ərazisi üzərində suverenliyini açıq şəkildə tanıdıq və tanıyırıq və gözləyirik ki, Azərbaycan da bizim kimi Ermənistan Respublikasının ərazi bütövlüyünü təhrif olmadan tanıyacaq və təhdid siyasətindən əl çəkəcək. Əslində Ermənistan Respublikasına qarşı gündəlik olaraq təhdid xarakterli bəyanatlar verilir. Bu şərtlərdə reaksiyamızı hətta ölkə daxilində də tənqid edirlər, çünki biz deyirik ki, 200 kvadrat kilometrdən artıq suveren ərazimizin işğal olunmuş hissələrinin hərbi yolla qaytarılmasını belə nəzərdən keçirməyəcəyik, çünki sərhədin demarkasiyası məsələsi ilə bağlı institusional qərarlar bu məsələni sülh yolu ilə, danışıqlar yolu ilə həll etməyi mümkün edir. Bütün bunların kontekstində biz Azərbaycana silahlara qarşılıqlı nəzarət mexanizmi yaratmağı təklif etdik, lakin Azərbaycan bütün bunlara hələlik cavab verməyib və Azərbaycanın hərbi büdcəsi Ermənistanın büdcəsindən üç dəfə çoxdur. Bu fonda bizi silahlanmaqda ittiham etmək ən azı ədalətsizlikdir” – Nikol Paşinyan bildirib.

Ermənistanın Baş naziri sərhədin tam demarkasiyasından sonra Ermənistan-Azərbaycan sərhədinin hər hansı hissəsində üçüncü qüvvələrin olmasına artıq ehtiyac qalmayacağını qeyd edib.