Ermənistan və Rusiya arasında münasibətlər Yerevanın Avropa İttifaqı ilə əməkdaşlığına görə heç vaxt sual altına düşməyəcək – bu haqda Ermənistanın Baş naziri Nikol Paşinyan Rusiya Prezidenti Vladimer Putinlə görüşü zamanı deyib.

“Bu kontekstdə, Rusiya Federasiyası ilə münasibətlərimiz heç vaxt sual altına düşməyib və düşməyəcək, çünki artıq dediyim kimi, bu əlaqələr və münasibətlər çox dərindir və müzakirə mövzusu deyil” – Ermənistanın Baş naziri bildirib.

Nikol Paşinyanın bəyanatına əsasən, Rusiya rəhbərliyinin bəyanatlarından sonra Ermənistan Qarabağı Azərbaycanın bir hissəsi kimi tanıyıb.

Ermənistanın Baş naziri sülh prosesində dəstəyə görə Rusiyaya bir daha təşəkkür edib.

“Bir daha Ermənistan və Azərbaycan arasında sülh prosesində həmişə hiss etdiyim dəstəyə görə sizə təşəkkür etmək istəyirəm. Biz bu məsələni dəfələrlə, əsasən işçi formatda müzakirə etmişik. Bəli, biz Qarabağı Azərbaycanın bir hissəsi kimi tanıdıq, lakin bunu yalnız Rusiya Federasiyasının ali rəhbərliyi bunu iki dəfə açıq şəkildə bildirdikdən sonra etdik. Yadınızdadırsa, biz bu barədə dəfələrlə danışmışıq” – Ermənistanın Baş naziri bildirib.

Bununla yanaşı, onun sözlərinə əsasən, Ermənistan və Azərbaycan arasında sülh bərqərar olub, bu da uzunmüddətli işin və bir çox beynəlxalq oyunçuların iştirakının nəticəsidir.

“Artıq dediyim kimi, Ermənistan və Azərbaycan arasında sülh bərqərar olub. Siz Prezident Trampdan bəhs etdiniz. Əlbəttə, o, bu prosesə töhfə verib” – Paşinyan qeyd edib.

O, həmçinin “Rusiyanın Ermənistan-Azərbaycan münasibətlərinin normallaşmasında mühüm rolunu” vurğulayıb.

“Lakin aydındır ki, siz şəxsən Azərbaycanla Ermənistan arasında münasibətlərin normallaşması prosesində çox vacib rol oynamısınız və oynayırsınız. Siz həmişə bütün bu prosesləri dəstəkləmisiniz və biz həmişə sıx əlaqədə olmuşuq. Mən sizi həmişə vaxtaşırı olaraq cari hadisələr barədə məlumatlandırmışam” – Nikol Paşinyan bildirib.

Son dövrlərdə inkişaf edən hadisələrdən danışarkən Ermənistanın Baş naziri diplomatik təmasların vacibliyindən danışıb.

“Yeri gəlmişkən, keçən ilin avqustunda Vaşinqtondan qayıdıb sizə zəng edəndə sizə dedim ki, Vaşinqtonda baş verənlər münasibətlərimizdə də yeni imkanlar açır. İndi isə bu, artıq faktdır. Rusiya ilə Ermənistan arasında dəmir yolu əlaqəsindən artıq bəhs etmişəm” – Paşinyan qeyd edib.