Nikol Paşinyan – Ermənistan çoxvektorlu siyasət yürüdür, qonşu İran və Gürcüstanla dostluq münasibətlərini dərinləşdirməklə yanaşı, Azərbaycan və Türkiyə ilə dövlətlərarası münasibətlər qururuq

Ermənistan çoxvektorlu xarici siyasət yürüdür, biz bunu balanslaşdırılmış xarici siyasət adlandırırıq – bu barədə Ermənistanın Baş naziri Nikol Paşinyan “Şanxay Əməkdaşlıq Təşkilatı”nın sammiti zamanı bildirib.

Paşinyanın sözlərinə əsasən, bu siyasətin mahiyyəti belədir – bir geosiyasi qütbün cazibəsi ölkənin müstəqilliyini məhv edə biləcək qədər güclənəndə, Yerevan suverenlik və müstəqilliyin mürəkkəb yolunda tarazlığı saxlamaq üçün verilmiş vəziyyətdə kifayət qədər cazibə qüvvəsinə malik olan digər qütblə münasibətlərini aktivləşdirir.

“Belə bir siyasətin əsas məqsədi suverenliyi və müstəqilliyi qoruyub saxlamaq və möhkəmləndirməkdir. Bu strategiyaları hazırlayarkən biz belə bir nəticəyə gəldik ki, münaqişə şəraitində yaşayarkən müstəqilliyə, suverenliyə malik olmaq qeyri-mümkündür və bu mənada çoxqütblülük, ilk növbədə, yaşadığın regionda özünü göstərməlidir. Məhz buna görə də qonşu İran və Gürcüstanla dostluq münasibətlərini dərinləşdirməklə yanaşı, biz digər iki qonşumuzla – Azərbaycan və Türkiyə ilə dövlətlərarası münasibətlər qururuq. Bu, əlbəttə, ötən ilin avqustun 8-də Ermənistan və Azərbaycan arasında ABŞ Prezidenti Donald Trampın dəstəyi və iştirakı ilə əldə olunmuş sülh sazişi sayəsində daha da konkretləşir. Hazırda biz Azərbaycan və Türkiyə ilə dövlətlərarası kommunikasiyalarımızı açmaq üzərində işləyirik, o cümlədən “Tramp marşrutu” layihəsinin reallaşdırılması yolu ilə ki, onun da yerində praktiki icrasına yaxın aylarda başlanılacaq. Bu, yalnız şərqdən qərbə, yəni Xəzər dənizindən Aralıq dənizinə deyil, həm də cənubdan şimala doğru Fars körfəzini Qara dənizlə bağlayacaq yeni nəqliyyat imkanları yaradacaq. Beləliklə, layihənin icrasından regionun bütün ölkələri faydalanacaq” – Paşinyan qeyd edib.