Erməni qızılgüllərinin və tərəvəzlərinin ilk partiyaları artıq yeni bazarlara ixrac olunur – bu haqda Ermənistanın Baş naziri Nikol Paşinyan bildirib.

Avropa İttifaqını, yoxsa digər bazarları nəzərdə tutduğu barədə suala Paşinyan: “Həm Avropa İttifaqını, həm də digərlərini” – deyə cavab verib.

“Bizim bir neçə biznes nümayəndə heyətimiz bu gün artıq fəaliyyət göstərir və qızılgüllərin, eləcə də tərəvəzlərin ilk partiyaları haqqında daha sonra məlumat verəcəyim ölkələrə göndərilib. Heç bir məhsul yerdə qalmayacaq. Onlar artıq başqa bazarlara ixrac edilir” – Nikol Paşinyan qeyd edib.

Ermənistanın Baş naziri Rusiyanın erməni kənd təsərrüfatı məhsullarına tətbiq etdiyi məhdudiyyətləri səhv adlandırıb.

“İnanıram ki, bu addımlar yanlışdır, çünki onlar insanları Avrasiya İqtisadi Birliyinə qarşı qaldıracaq və mən, Avrasiya İqtisadi Birliyinin yüksək rütbəli rəsmisi olaraq, bunu problem hesab edirəm. Lakin biz bütün problemləri həll edəcəyik” – Ermənistanın Baş naziri bildirib.

Jurnalistin – “Ermənistan kənd təsərrüfatı məhsulları ilə bağlı, xüsusən də fitosanitar nəzarət sahəsində problemlərin mövcudluğunu qəbul edirmi?” – sualına Paşinyan cavab verib ki, bu cür problemlər ayrı-ayrı şirkətlər tərəfindən yarana bilər.

“Ayrı-ayrı şirkətlərin problemləri var və bu, Rusiya da daxil olmaqla, hər yerdə belədir. Ümumilikdə bizim çox yaxşı nəzarət sistemimiz var və biz kənd təsərrüfatı məhsullarımızın keyfiyyətini yaxşılaşdırmağa davam edirik” – Nikol Paşinyan qeyd edib.