Ermənistanın Baş naziri bildirib ki, Dağlıq Qarabağdan məcburi köçürülən şəxslərin geri qaytarılması məsələsi təhlükəlidir.

Nikol Paşinyan bunu beynəlxalq forum “Orbeli – 2025”də çıxışı zamanı deyib.

Onun sözlərinə görə, illərdir o, “əgər tarixi Ermənistan və real Ermənistanın qavrayışı dəyişməzsə, sülh pozulacaq” – deyə xəbərdar edirdi.

“Biz sülhə qulluq etmək istəyirik, yoxsa yox? Ermənistan hökumətinin və erməni xalqının iradəsidir ki, Ermənistan və Azərbaycanın öz əlləri ilə yaratdığı sülhü qorumağa davam etsin və bu, unikal bir haldır. Bu dəyər xüsusi diqqət tələb edir, bir çox baxış və qavrayışlara yenidən nəzər salmalıyıq”, – deyə Nikol Paşinyan bildirib.

Onun sözlərinə görə, Ermənistan və Azərbaycan arasında strateji razılaşma sülhü möhkəmləndirəcək.

“Politik baxımdan münaqişə mahiyyətcə artıq bitib, həll olunub, lakin sosial-psixoloji səviyyədə yox. 30 ildən artıq davam edən heç bir proses bir anda həll edilə bilməz, amma bu, siyasi liderliklə mümkündür. Biz tarixin istehlakçıları olmaq istəyirik, yoxsa yaradıcıları? Son iki ilin təcrübəsi göstərir ki, biz tarixi yaradan tərəf ola bilərik, bu isə tarixi unutmaq demək deyil”, – deyə Ermənistan Baş naziri bildirib.