Nikol Paşinyan bildirib ki, Ermənistan-Rusiya münasibətlərində böhran yaratmaq istəyənlərin sayı kifayət qədər çoxdur, lakin onlar Rusiya ilə nə mübahisə edəcək, nə də qarşıdurmaya gedəcəklər.

Jurnalistin hakimiyyətin bir tərəfdən Rusiya ilə dost münasibətlərdən danışdığı, digər tərəfdən isə Rusiyanın Ermənistan maraqlarına qarşı casusluq fəaliyyəti apardığını bəyan etməsinin iki ölkə arasında münasibətlər böhranı anlamına gəlib-gəlmədiyi ilə bağlı sualına Paşinyan belə qiymətləndirmənin yanlış olduğunu deyib.

“Görürəm ki, çoxları Ermənistan-Rusiya münasibətlərində böhran yaratmaq istəyir, amma artıq dediyim kimi, biz Rusiya ilə mübahisə etməyəcəyik və savaşmayacağıq. Rusiya superdövlətdir və ona hörmətlə yanaşmaq lazımdır. Biz də bunu edirik”, — deyə Paşinyan bildirib.

Bununla yanaşı, o qeyd edib ki, Ermənistanda Rusiya təbii qazının qiyməti artmayacaq, çünki bu məsələ ilə bağlı qarşılıqlı faydalı razılaşma mövcuddur.

“Biz əvvəllər təbii qazın qiymətləri ilə bağlı aydın strateji razılaşma əldə etmişik və həmin razılaşma qüvvədə qalmalıdır. Qazın qiymətinin artırılması mümkün deyil, çünki qüvvədə olan razılaşmamız var və bu razılaşma qarşılıqlı faydalıdır, müvafiq şərtləri ehtiva edir”, — deyə Paşinyan vurğulayıb.

Paşinyan həmçinin bildirib ki, Avrasiya İqtisadi İttifaqındakı status məsələsinə yalnız Ermənistan baxa bilər, yəni bu birlikdən çıxıb-çıxmamaq qərarını yalnız Ermənistan verə bilər.

“Başqa prosedur mövcud deyil. Eyni zamanda biz digər sualları da cavablandırmağa hazırıq”, — deyə Paşinyan əlavə edib.