Nikol Paşinyan: Biz bir erməni stulunda oturmuşuq, ikincisinə ehtiyacımız yoxdur

„Biz bir erməni stulunda oturmuşuq“, – Ermənistanın Baş naziri Nikol Paşinyan rusiyalı jurnalistin Ermənistanın „iki stul arasında oturmağa“ çalışdığı barədə sualını belə cavablandırıb.

„Niyə iki stul? Biz bir erməni stulunda oturmuşuq, ona görə də ikincisinə ehtiyacımız yoxdur“, – deyə Ermənistanın Baş naziri bildirib.

Bununla yanaşı, Paşinyan rusiyalı jurnalistin sualını cavablandırarkən bildirib ki, İrəvan balanslaşdırılmış xarici siyasəti davam etdirmək niyyətindədir.

„Artıq dediyimiz kimi, balanslaşdırılmış xarici siyasəti davam etdirməyi planlaşdırırıq“, – deyə Paşinyan BMT Baş Assambleyasının iclasında iştirak etmək üçün səfərdə olduğu Nyu-Yorkda bildirib.

Jurnalist Paşinyandan Ermənistanın Avropa bazarına ixrac perspektivləri barədə də soruşub. Jurnalistin sözlərinə görə, Avropa tərəfi Ermənistanın kənd təsərrüfatı məhsullarının, o cümlədən meyvə və tərəvəzin 99 faizinin Avropa İttifaqı bazarına daxil ola biləcəyini bildirib. Jurnalist Paşinyandan avropalıların vədlərinə əməl etməyəcəyindən narahat olub-olmadığını soruşub.

„Niyə? Niyə bizi aldatmalıdırlar? Biz bütün tərəfdaşlarımızla səmimi və açıq olmağa çalışırıq və ümid edirik ki, qarşılıqlı şəkildə də belə davranılacaq“, – deyə Ermənistanın Baş naziri bildirib.