Nika Qvaramia – Murtaz Zodelava ilə bağlı nəsə bəyanata ehtiyac olsaydı, ailəsi başqasının köməyi olmadan bunu edərdi, siyasi don geyindirməyə ehtiyac yoxdur

Murtaz Zodelava ilə bağlı nəsə bəyanata ehtiyac olsaydı, ailəsi başqasının köməyi olmadan bunu edərdi, siyasi don geyindirməyə ehtiyac yoxdur – bu barədə “Müxalifət Alyansı”nın liderlərindən biri Nika Qvaramia sosial şəbəkədə yazır.

Qvaramianın yazdığı kimi, Murtaz Zodelava özünü normal hiss edir.

“Dünən “Vivamed”də Murtaz Zodelavanın yanında idim. O, mənim ən yaxın dostumdur, mən onun nikah şahidiyəm və övladının xaç atasıyam. Nəsə bəyanata ehtiyac olsaydı, ailəsi başqasının köməyi olmadan bunu edərdi. İnsanın sağlamlıq məsələsi həll olunur və siyasi don geyindirməyə ehtiyac yoxdur, özü də onun razılığı olmadan. Üstəlik, onun özü buna qəti şəkildə qarşıdır, ilk növbədə ona görə ki, yaşlı valideynləri üçün bu məsələ çox həssasdır və bu cür məlumatın ictimai mənbələr vasitəsilə yayılmasını məqsədəuyğun hesab etmir.
Murtaz özünü normal hiss edir. Klinika ona qarşı çox diqqətlidir və ümid edirik ki, pasiyentin maraqları yüksək səviyyədə nəzərə alınmaqla və onun sağlamlıq vəziyyəti barədə şəxsi məlumat sızdırılmadan hər şey normal məcrasına qayıdacaq” – Nika Qvaramia yazır.

Məlumat üçün bildirək ki, Gürcüstanın sabiq prezidenti Mixeil Saakaşvili bu gün sosial şəbəkədə yazıb: “Silahdaşımız və sadəcə çox yaxşı insan – Murtaz Zodelava, səhhətinin ağır olması səbəbindən təcili olaraq “Vivamed”ə köçürülüb. Məlum olub ki, o, mənim yanımdakı kamerada iki dəfə insult keçirib”.

Bununla yanaşı, Xüsusi Penitensiar Xidmət bir müddət əvvəl Murtaz Zodelavanın sağlamlıq vəziyyəti ilə bağlı bəyanat yayıb. Bəyanatda Zodelavanın insult keçirmədiyi qeyd olunub: “Hər cür kəskin patoloji proses istisna edilib, istənilən insanı yalan məlumat yaymaqdan çəkinməyə çağırırıq” – Penitensiar Xidmətin bəyanatında deyilir.