“New York Times”ın məlumatına əsasən, İsraildən Ukraynaya “Patriot” tipli uzaqmənzilli zenit-raket kompleksi göndərəcəklər

İsraildə yerləşdirilən uzaqmənzilli zenit-raket kompleksi “Patriot”u Ukraynaya göndərəcəklər. Bu barədə “New York Times” öz mənbələrinə istinadən yazır. ABŞ-nin Müdafiə Departamentində bununla bağlı bəyan etdikləri kimi, “Ukrayna üçün əvvəllər təsdiqlənmiş paketlərdən avadanlıqların tədarükünü davam etdirirlər”.

“New York Times”ın məlumatına əsasən, hazırda Ukrayna Silahlı Qüvvələrinin səkkiz ədəd “Patriot” tipli zenit-raket kompleksi var, lakin onlardan yalnız altısı işlək vəziyyətdədir. İki kompleks təmir prosesindədir.

Yüksək rütbəli amerikalı rəsmilərdən birinin qeyd etdiyi kimi, İsraildən Ukraynaya “Patriot” göndərilməsi və Almaniya və ya Yunanıstan tərəfindən daha bir sistemin verilməsi halında, Ukraynada onların sayı 10-a çatacaq.

Məlumat üçün bildirək ki, Amerika Birləşmiş Ştatlarında qüvvədə olan qaydalara əsasən, Vaşinqton Ukraynaya Amerika raket sistemlərinin çatdırılmasını, hətta bu silahların üçüncü ölkələrin yardımı ilə Kiyevə ötürülməsi halında da, mütləq təsdiqləməlidir.

Medianın ehtimal etdiyi üzrə, İsraildən Ukraynaya göndərilən “Patriot” tipli zenit-raket kompleksi yaya qədər Ukraynaya çatacaq.