Mərkəzi Seçki Komissiyası 26 oktyabr seçkiləri ilə bağlı Gürcüstanın Prezidenti Salome Zurabişvili tərəfindən yayılmış ittihamlara münasibət bildirir və bu, MSK-nın bəyanatına əsasən, konkret siyasi maraqlardan irəli gələn dezinformasiya və manipulyasiya kampaniyasının davamıdır.

Mərkəzi Seçki Komissiyasının bəyanatında deyilir ki, Salome Zurabişvilinin guya seçkilərin saxtalaşdırılması, baş tutmaması haqda bəyanatları tamamilə arqumentsizdir və faktiki vəziyyətə siyasi motivlə məhəl qoymur.

“Bir daha xüsusilə vurğulayırıq ki, parlament seçkiləri zamanı bu seçkilərin yekun nəticələrinə ciddi təsir göstərə biləcək pozuntuların baş verdiyinə dair təsdiqlənmiş fakt və sübutlar yoxdur. Buna baxmayaraq, Gürcüstanın Prezidenti təəssüf ki, bəzi maraqlı nümayəndələrin təbliğat narativini təkrarlayır və bununla yerli və ya beynəlxalq səviyyədə seçkiləri və müvafiq olaraq, Seçki Administrasiyasını gözdən salmağa çalışır, bununla da onsuz da qütbləşmiş mühitə daha çox gərginlik daxil etməyə töhfə verir.

Seçki prosesində bəzi iradların, nöqsanların və ya narahatlıqların olmasına baxmayaraq, qeyd etmək lazımdır ki, Seçki Administrasiyası 26 oktyabr seçkilərini yüksək peşəkarlıq səviyyəsində və qanuna tam əməl etməklə keçirib, bu da ən azı ATƏT/DTİHB-nin müşahidə missiyasının bu yaxınlarda dərc olunmuş qiymətləndirməsində öz təsdiqini tapıb. Həmçinin, bizim tərəfimizdən öz səlahiyyətlərimiz çərçivəsində seçki prosesinin təkmilləşdirilməsini təmin etmək üçün verilən bütün tövsiyələri müzakirə etməyə və mümkün qədər nəzərə almağa dair tam hazırlıq ifadə olundu. Biz tam əminik ki, gərginliyi daha da artırmağa çalışmaq əvəzinə, indi məhz belə bir prosesin təşəbbüsünü irəli sürməyin və iştirakçı tərəflər arasında sakit mühitdə müzakirə aparmağın vaxtıdır.

Bununla yanaşı, ictimaiyyətə xatırlatmaq istərdik ki, 26 oktyabr seçkilərinin nəticələrinin elan edilməsindən sonra “ehtimal edilən saxtalaşdırılma” ilə bağlı yayılmış bəyanatlardan irəli gələrək, Seçki Administrasiyasının özü səlahiyyətli quruma müraciət edərək, yayılmış iradların obyektiv qiymətləndirilməsi üçün istintaqın başladılmasını tələb edib. İctimai şəkildə yayılmış məlumatla məlum olduğu kimi, səslənən ittihamlarla bağlı hələlik heç kim əsaslı və ya konkret sübut təqdim etməyib.

Biz bir daha prezidenti və bu cür ittihamlar irəli sürən bütün maraqlı şəxsləri müvafiq, əsaslandırılmış sübutlar təqdim etməyə və ya ictimaiyyətin seçki prosesinə etimadına zərbə vuran arqumentsiz/əsassız və çaşdırıcı bəyanatları yaymamağa çağırırıq.

Seçki Administrasiyası qətiyyətlə şəffaflıq və hesabatlılıq standartının müdafiəçisi olaraq qalır. İctimaiyyətin seçki prosesinin bütövlüyü barədə dəqiq məlumatlandırılmasını təmin etmək üçün istənilən dezinformasiya faktiki və əhatəli cavabla müşaiyət olunacaq. Biz bütün maraqlı tərəfləri məsuliyyətlə hərəkət etməyə və Gürcüstanın demokratik təsisatlarının məhvinə yox, ona inamın gücləndirilməsinə töhfə verməyə çağırırıq” – MSK-nın bəyanatında deyilir.