Saat 12:00 üçün özünüidarəetmə seçkilərində seçici fəallığı 17.15 faiz təşkil edir – bu barədə MSK-nın mətbuat katibi Natia İoseliani brifinqdə deyib.

İoselianinin qeyd etdiyi kimi, bu vaxt üçün dairə seçki komissiyalarına şikayət daxil olmayıb.

“Seçici fəallığı ilə bağlı məlumat verməzdən əvvəl diqqəti bir neçə dəqiqə əvvəl bizə məlum olan məlumata çəkmək istəyirəm. MSK adından seçkilərdə olub-olmadıqlarını guya yoxlamaq üçün vətəndaşlara zəng edirlər. Bu da öz növbəsində MSK adından müxtəlif təxribat xarakterli bəyanatlara hazırlığa bənzəyir. Biz qətiyyətlə bəyan edirik ki, Seçki Administrasiyası tərəfindən belə telefon zəngləri edilməyib. Görünür, müəyyən şəxslər institutun nüfuzuna zərər vurmaq üçün qəsdən Mərkəzi Seçki Komissiyasının adından istifadə edirlər və belə manipulyasiyalarla seçiciləri çaşdırmağa çalışırlar. Hamıya səslənirik, Mərkəzi Seçki Komissiyasının adından istifadə etməsinlər və seçki mühitinə zərər vurmasınlar.

İndi isə seçici fəallığı ilə bağlı məlumat verəcəyik, saat 12:00 üçün seçki məntəqələrinə 602 445 seçici gəlib. Ən yüksək seçici fəallığı Raca-Leçxumi və Kvemo Svaneti bölgəsindədir. Onu da bildiririk ki, bu vaxt üçün dairə seçki komissiyalarına şikayət daxil olmayıb” – Natia İoseliani bildirib.

Məlumat üçün bildirək ki, bu gün Gürcüstanda yerli özünüidarəetmə seçkiləri keçirilir. Səsvermə prosesi saat 08:00-da başlayıb və 20:00-da başa çatacaq. Ölkə miqyasında 3061 seçki məntəqəsi fəaliyyət göstərir. Yerli seçkilər üçün 12 siyasi partiya qeydiyyatdan keçib.

Mərkəzi Seçki Komissiyasının sədri Qiorqi Kalandarişvilinin bəyanatına əsasən, ilkin nəticələr səsvermə başa çatdıqdan sonra təxminən iki saata məlum olacaq.