MSK-da bildiriblər ki, oktyabrın 3-də keçiriləcək aralıq seçkilər üçün elektron texnologiyaların diaqnostikası və proqram təminatının sazlanması başa çatdırılıb

Seçki administrasiyası oktyabrın 3-də keçiriləcək aralıq seçkilərə hazırlığı davam etdirir. Mərkəzi Seçki Komissiyasının (MSK) əməliyyat-anbar məkanında seçkilərdə istifadə olunacaq elektron texnologiyaların diaqnostikası və yekun proqram təminatının sazlanması başa çatıb. Bu barədə MSK məlumat yayıb.

MSK-nın məlumatına görə, görülən işlər çərçivəsində seçkilər üçün 8 səsvermə və səslərin hesablanması elektron aparatı, seçicilərin verifikasiyası üçün 9 aparat və 7 planşet hazırlanıb. Planşetlərdən 3-ü səsvermənin ənənəvi üsulla keçiriləcəyi seçki məntəqələri üçün nəzərdə tutulub.

“Seçki elektron texnologiyaları MSK-nın logistika qrupu tərəfindən əvvəlcədən müəyyən edilmiş qrafikə uyğun olaraq artıq dairə seçki komissiyalarına təhvil verilib. Dairə seçki komissiyaları isə texniki vasitələri səsvermə günündən bir gün əvvəl müvafiq məntəqə seçki komissiyalarına təqdim edəcəklər.

Oktyabrın 3-də keçiriləcək aralıq seçkilər üçün ümumilikdə 7 seçki məntəqəsi açılacaq. Onlardan 4-də seçicilərin elektron verifikasiyası və səslərin hesablanması aparatlarından istifadə olunacaq”, – deyə MSK-nın məlumatında bildirilir.