Giorgi Qaxariya partiyasının səkkiz üzvü siyasi boykotu dayandıraraq parlamentə daxil ola bilər.

Mövcud məlumata əsasən, mandatı dayandırılmış deputatların əvəzediciləri olan səkkiz nəfər parlamentə daxil olmaq məqsədilə qanunverici orqana müraciət edib.

Onlar bunlardır: Tamar Xvedeliani, Vika Pilpani, Giga Farulava, Giorgi Şaraşidze, Malxaz Toria, Gela Abuladze, Salome Kobaladze və Sofio Xorquani.

“Komitəmizə bu şəxslərin ərizələri daxil olub, onlar deputatlıqla uyğun gəlməyən vəzifələrdən imtina edirlər. Hazırda onların parlamentə daxil olması üçün sənəd hazırlığı prosesi gedir. Qaxariya da etdikləri hər şeyi səhv kimi qəbul etdi. Onlar agentura müxalifətinin üzvləridir, müstəqil qərar qəbul etmirlər, tapşırıqları yerinə yetirirlər və parlamentə girməmək kimi səhvlərə yol verirlər”, – deyə Parlamentin Prosedur məsələləri komitəsinin sədri Davit Matikaşvili bildirib.

Partiyanın üzvü Giorgi Şaraşidze yayılan məlumatı təsdiqləmir və bildirir ki, onların parlament boykotu davam edir.

“Biz Gürcüstan parlamenti ilə heç bir prosedur həyata keçirməmişik. Heç bir müraciət etməmişik”, – deyə Giorgi Şaraşidze bildirib və əlavə edib ki, müvafiq qərarı 4 oktyabr seçkilərindən sonra qəbul edəcəklər.

Parlament 2 sentyabrda “Qaxariya Gürcüstan üçün” partiyasının 12 üzvünün deputat mandatının dayandırılmasını təsdiqləyib.

Qaxariya və onun 11 tərəfdaşının əvəzediciləri bunlardır: Gela Abuladze, Cemal Ananidze, Ketəvan Bakaradze, Rusudan Tevzadze, Malxaz Toria, Şalva Kereselidze, Salome Kobaladze, Giga Farulava, Vika Pilpani, Giorgi Şaraşidze, Tamar Xvedeliani və Sofio Xorquani.

Xatırladaq ki, Giorgi Qaxariya parlament mandatlarından imtinanı səhv adlandırıb və partiya üzvlərinin parlamentə daxil olmasını istisna etməyib.