Moldova Polisinin Baş Müfəttişliyində moldovalılara seçkilər və referendumda rüşvət vermək üçün Rusiyadan 24 milyon dollardan çox vəsaitin köçürüldüyünü bildirirlər

 
Moldovada referendum və prezident seçkiləri öncəsi seçicilərə rüşvət vermək üçün təkcə oktyabrda Rusiyadan Moldovaya 24 milyon dollardan çox vəsait köçürülüb.

Moldova Polisinin Baş Müfəttişliyinin rəhbəri Viorel Çerneutsanu bu haqda seçicilərə rüşvət verilməsi işi ilə bağlı keçirilən brifinqdə bildirib, yerli media yazır.

İstintaq materiallarına əsasən, pul “Promsviazbank” tətbiqindən istifadə edilməklə köçürülüb.

Onun bəyanatına əsasən, sözügedən bankdan istifadə edərək seçicilərə rüşvət verilməsi sxeminə yazın sonunda start verilib. İstintaqa əsasən, sentyabrda transferlərin ümumi məbləği 15 milyon, oktyabrın son məlumatlarına görə isə 39 milyon dollar təşkil edib.

Hüquq-mühafizə orqanlarının əməkdaşlarının məlumatına əsasən, sistemdə Moldovadan 138 min nömrə qeydə alınıb.

Moldova polisində bildirirlər ki, bu sxemin arxasında qaçaq moldovalı rusiyayönlü iş adamı İlan Şor dayanır.

“Bütün vətəndaşlarımızın qanunsuz sxemə sürükləndiklərini başa düşmələri vacibdir”, – Çerneutsanu bildirib.

Hazırda polis seçicilərə rüşvət verilməsi sxemi ilə əlaqəsi olan 520-dən çox şəxsi qeydiyyata alıb. Onları üç ilə qədər həbs və ya cərimə gözləyir.

Moldovada prezident seçkilərinin ikinci turu noyabrın 3-də keçiriləcək.