Moctaba Xameneinin məsləhətçisi – Bütün qonşu və dünya ölkələrinə deyirik ki, iqtisadi müharibədə ABŞ-a qoşulmasınlar, istənilən belə ölkə düşmən sayılacaq, onların maraqlarını hədəf alacağıq

Bizə qarşı iqtisadi məhdudiyyətlərin tətbiq olunmasında iştirak edən istənilən ölkə düşmən sayılacaq – bu barədə İranın Ali Milli Təhlükəsizlik Şurasının katibi və İranın ali lideri Moctaba Xameneinin hərbi məsləhətçisi Mohsen Rezai bildirib.

Onun sözlərinə əsasən, ABŞ Prezidenti Donald Tramp növbəti addımı atmağa qərar verərsə, İranın cavabı seysmik miqyasda olacaq.

“İlk növbədə, bütün qonşu və dünya ölkələrinə deyəcəyik ki, Amerika Birləşmiş Ştatlarına onun iqtisadi müharibəsində qoşulmasınlar. Bizə qarşı iqtisadi məhdudiyyətlərin tətbiq olunmasında iştirak edən istənilən ölkə düşmən sayılacaq. Əlbəttə, ilkin olaraq onlar ilə danışıqlar aparacağıq. Danışıb deyəcəyik ki, kənarda dursunlar və Amerika Birləşmiş Ştatları ilə məsafə saxlasınlar. Lakin onlar bunu etməsələr, biz onlara zərbə endirəcəyik. Biz bu ölkənin maraqlarını hədəf alacağıq” – Mohsen Rezai bildirib.

O, İranın bir neçə aydır dəniz blokadası şəraitində olmasına baxmayaraq, neft satışının yenə də davam etdiyini deyib.

“Dəniz blokadasında yeni heç nə yoxdur. Artıq bir neçə aydır ki, dəniz blokadası şəraitindəyik, lakin neft satışını yenə də davam etdiririk. Təkcə son bir və ya iki ay ərzində 70 milyon barel neft satmışıq. Razılaşmadan sonrakı ilk həftə yaxşı idi, çünki ehtiyatda olan 70 milyon barel nefti ixrac etdik. ABŞ hərbi gəmilərinin mövcudluğuna baxmayaraq, hər gün gündəlik hasilatımıza uyğun miqdarda neft satırıq. Cənab Trampın dəniz blokadasının nail olduğu şey budur” – Rezai qeyd edib.