Milli Statistika Xidmətinin məlumatına əsasən, 2024-cü ilin üçüncü rübündə Gürcüstanda orta aylıq nominal əməkhaqqı ötən ilin müvafiq dövrü ilə müqayisədə 10,9 faiz, yəni 201,3 lari artıb və 2056,7 lari təşkil edib.

Milli Statistika Xidmətinin məlumatına əsasən, fəaliyyət növlərinə əsasən nisbətən yüksək maaş aşağıdakı sahələrdə qeydə alınıb:

İnformasiya və rabitə – 3 976,9 lari (keçən ilin müvafiq dövrü ilə müqayisədə 0,5 faizlə artıb); Tikinti – 3 198,2 lari (5,4 faizlə artıb); Maliyyə və sığorta fəaliyyətləri – 3 186,6 lari (13,5 faizlə artıb); Peşə, elmi və texniki fəaliyyətlər – 3 062,9 lari (17,1 faizlə artıb).

Bununla yanaşı, qurumun hesabatına əsasən, 2024-cü ilin üçüncü rübündə qadınların orta əməkhaqqı 1650,6 lari, kişilərinki isə 2451,0 lari ilə müəyyən edilib. Maaşların illik artımı qadınlarda 191,5 lari (13,1%), kişilərdə isə 217,0 lari (9,7%) təşkil edib. Fəaliyyət növlərinə əsasən, kişilərin əməkhaqqı demək olar ki, bütün sahələrdə qadınların maaşından yüksək olub.

2024-cü ilin üçüncü rübündə muzdlu işçilərin orta aylıq əməkhaqqı biznes sektorunda 182,9 lari, yəni 9,1% artıb və 2 190,1 lari təşkil edib. Fəaliyyət növlərinə əsasən ən yüksək maaş informasiya və rabitə sahəsindədir – 4065,8 lari. Həmçinin, peşə, elmi və texniki fəaliyyətlər – 3 500,5 lari.

Milli Statistika Xidmətinin məlumatına əsasən, 2024-cü ilin üçüncü rübündə qeyri-sahibkarlıq və maliyyə sektorunda orta aylıq əməkhaqqı ötən ilin müvafiq dövrü ilə müqayisədə 234,0 lari, yəni 14,8% artıb və 1813,5 lari təşkil edib. Fəaliyyət növlərinə əsasən maliyyə və sığorta fəaliyyətində çalışanlar nisbətən yüksək orta əməkhaqqına malikdirlər.

Regionlar üzrə orta əməkhaqqının böyüklüyünə görə Tbilisi və Mtsxeta-Mtianeti liderlik edir.