Milli Qida Agentliyi Zuqdididə içməli su və limonad istehsal edən “Anaklia” MMC-də gigiyena normalarının və etiketləmə qaydalarının pozulduğunu, həmçinin vaxtı keçmiş məhsulların satışı hallarını aşkarlayıb

Milli Qida Agentliyi Zuqdididə yerləşən “Anaklia” MMC-də kritik uyğunsuzluqlar aşkarlayıb.
Milli Qida Agentliyinin məlumatına görə, qanunvericiliyə uyğun olaraq biznes operatoru cərimələnib və müəssisənin istehsal prosesi dayandırılıb.

“Milli Qida Agentliyinin Sameqrelo-Zemo Svaneti departamentinin müfəttişləri dövlət nəzarəti çərçivəsində Zuqdididə içməli su və limonad istehsal edən “Anaklia” MMC-ni (ünvan: Zuqdidi şəhəri, Qriboyedov küçəsi №77) plandankənar yoxlayıblar. Yoxlama nəticəsində kritik uyğunsuzluqlar, o cümlədən gigiyena normalarının kobud şəkildə pozulması və infrastruktur problemləri aşkarlanıb. Eyni zamanda, etiketləmə qaydalarının pozulması və vaxtı keçmiş məhsulların satışa çıxarılması halları qeydə alınıb.

Milli Qida Agentliyi istehlakçıların sağlamlığının və qida təhlükəsizliyinin qorunması məqsədilə bütün ölkə ərazisində dövlət nəzarəti həyata keçirir”, – deyə agentliyin yaydığı məlumatda bildirilir.