Milli Bank sabit virtual aktivlər üzrə hesabatlılıq qaydalarını təsdiqləyib

Stabil virtual aktivlərin və onların ehtiyat aktivlərinin davamlı və şəffaf monitorinqi məqsədilə Gürcüstan Milli Bankı stabil virtual aktivlər üzrə yeni hesabatlılıq qaydalarını təsdiqləyib.
Milli Bankın məlumatına görə, qaydaların məqsədi virtual aktivlərə xidmət sektoruna etimadı artırmaq, istifadəçilərin hüquqlarını qorumaq və risklərin qarşısını almaqdır.
Yeni qaydaların hazırlanması Milli Bankın nəzarət təcrübəsinə, beynəlxalq təşkilatların tövsiyələrinə və qabaqcıl qlobal təcrübəyə əsaslanır.
Stabil virtual aktivlər üzrə hesabatlılıq qaydaları hesabat formalarının doldurulması və təqdim edilməsi ilə bağlı tələbləri müəyyən edir və emitentin Milli Banka təqdim etməli olduğu məlumatların siyahısını ətraflı şəkildə müəyyənləşdirir.
Nəzarət çərçivəsində hesabatlılığın tətbiqi Milli Banka ilkin təklif çərçivəsində emitent tərəfindən buraxılmış və dövriyyədə olan stabil virtual aktivlər, eləcə də onlarla əlaqəli ehtiyat aktivlər barədə tam və müntəzəm məlumat əldə etməyə imkan verəcək. Buraya xüsusilə ehtiyatların strukturu və onların tərkibinə daxil olan likvid aktivlərin nisbəti daxildir.
Stabil virtual aktiv emitenti qaydalarda nəzərdə tutulan hesabatı həmin qaydaların əlavəsində müəyyən edilmiş formaya uyğun doldurmalı və ilk hesabatı Milli Banka ən geci 15 oktyabr 2026-cı il tarixinədək təqdim etməlidir.